„Það á að vera fælingarmáttur í þeim“

Lög­regl­an á höfuðborg­ar­svæðinu hef­ur reist varðturna á fjöl­förn­um stöðum í höfuðborg­inni.  Vasaþjófnaður hef­ur auk­ist veru­lega í Reykja­vík að und­an­förnu en að sögn lög­reglu týn­ist fólk til lands­ins „sem er að stunda þetta skipu­lega“.

„Þarna eru mynda­vél­ar sem eru okk­ar augu og eyru á þess­um stöðum þar sem við ekki höfðum mynda­vél­ar,“ seg­ir Guðmund­ur Pét­ur Guðmunds­son, lög­reglu­full­trúi hjá lög­regl­unni á höfuðborg­ar­svæðinu, spurður út í varðturn­ana sem hafa nú verið reist­ir við Skóla­vörðustíg og Hall­gríms­kirkju.

„Þær tengj­ast svo þessu neti ör­ygg­is­mynda­véla sem lög­regl­an og Reykja­vík­ur­borg eru með í sam­starfi. Við erum að bregðast við þeim fjölda vasaþjófnaðar­mála sem hafa komið upp núna síðustu tvo mánuði,“ bæt­ir hann við.

Nýir varðturn­ar komi til með að hjálpa lög­reglu að leysa allskon­ar mál, þó ástæðan fyr­ir til­komu þeirra sé aðallega vasaþjófnaður.

„Efla fæl­ing­ar­mátt við af­brot­um“

Spurður hvað sé að valda aukn­ingu á vasaþjófnaði seg­ir Guðmund­ur fólk vera að týn­ast til lands­ins „sem er að stunda þetta skipu­lega“.

„Það eru svo sem líka Íslend­ing­ar að stunda vasaþjófnað en ekk­ert svona eins og er núna að ger­ast. Það eru ansi kræf­ir þjóf­ar á ferð. Við erum búin að hand­taka nokkra vasaþjófa og erum með mál á þá, en þetta held­ur samt áfram,“ seg­ir hann.

Lög­regl­an sé að bregðast við vegna fjölda ferðamanna á þess­um slóðum – í og fyr­ir utan Hall­gríms­kirkju og niður Skóla­vörðustíg­inn, sér­stak­lega á regn­boga­hlut­an­um.

„Við erum að reyna að efla fæl­ing­ar­mátt við af­brot­um, hjálpa okk­ur að leysa mál sem koma upp og efla ör­yggis­kennd þeirra sem eru á ferðinni þarna, hvort sem það eru Íslend­ing­ar eða ferðamenn.“

Seg­ir turn­ana vera til­rauna­verk­efni

Guðmund­ur seg­ir turn­ana vera til­rauna­verk­efni til þriggja mánaða sem verði svo end­ur­metið. Aðspurður seg­ir hann end­ur­matið byggja á hver málastaðan verði eft­ir sum­arið.

Ef tíðnin lækk­ar megi ætla að turn­arn­ir hafi fæl­ing­ar­mátt en einnig verði horft á hve mikið fleiri mál lög­regl­an nær að leysa.

Að sögn Guðmund­ar leys­ir lög­regl­an fullt af mál­um með aðstoð mynda­véla dags­dag­lega, víðsveg­ar um borg­ina.

Fjöldi öku­tækja sé t.d. kom­inn með upp­töku­vél­ar til að leysa hvernig til­drög voru í  um­ferðarslysi. Seg­ir hann upp­tök­ur mjög stór­an vax­andi þátt í starfi lög­reglu.

„Þetta verður alltaf um­deilt, við vit­um það“

Í face­book hóp fyr­ir íbúa í miðborg Reykja­vík­ur hef­ur farip fram mik­il gagn­rýni á varðturn­un­um. Einn íbúi kallaði turn­ana skrímsli og sagðist venju­lega setja spurn­ing­ar­merki við eft­ir­lits­mynda­vél­ar og sér­stak­lega á um­rædd­um stöðum.

Ekki hafa all­ir íbú­ar þó tekið í sama streng en nokkr­ir hafa bent á að turn­arn­ir auki ör­yggi í borg­inni, nema fyr­ir þá sem hafi eitt­hvað að fela.

Spurður álits á þess­um um­mæl­um seg­ir Guðmund­ur að alltaf megi deila um sjón­meng­un, þar sé ólík­legt að all­ir verði sam­mála. Reynt hafi verið að stilla þeim upp þannig að þeir væru ekki í „hefðbund­inni mynd ferðamanns­ins“.

„Þetta er ekki í sjón­línu upp Skóla­vörðustíg­inn, þetta er ekki beint fyr­ir fram­an kirkj­una held­ur aðeins til hliðar, ör­lítið falið.

Að sjálf­sögðu sjást þeir samt, það á að vera fæl­ing­ar­mátt­ur í þeim, að sjá að það séu mynda­vél­ar, en þetta verður alltaf um­deilt, við vit­um það.“