Segir BLÖ-strákana hafa staðið sig vel
Setja bókamerki
FM95BLÖ strákarnir, Auddi, Steindi og Egill, stóðu sig að mestu leyti mjög vel með undirbúninginn fyrir tónleikana á laugardagskvöldið.
Þetta segir Birgir Bárðarson, framkvæmdastjóri Íþrótta- og sýningahallarinnar hf., rekstraraðila Laugardalshallar, í samtali við mbl.is.
„Auðvitað má alltaf gagnrýna það. Þú ert alltaf vitur eftir á,“ segir Birgir. Margt megi þó læra af kvöldinu, herða og bæta.
„Tryggja að slíkt gerist ekki aftur“
„Verkferlarnir eru í góðum málum og þeim var öllum fylgt en þarna myndaðist fólksstýringarvandamál sem olli alveg hræðilegum viðburði í anddyrinu,“ segir Birgir. Mikil vinna hafi átt sér stað síðustu daga, meðal annars við áhorf á upptökur úr myndavélum til að greina aðstæður enn betur.
„Hvað fór fram, hvað gerðist, af hverju gerðist þetta. Í von um að tryggja að slíkt gerist ekki aftur.“
Segir hann nýtt fyrirkomulag um aðkomu viðburða hafa verið þróað í kjölfar atburða laugardagskvöldsins. Herða eigi á öllum þáttum og það tryggi vonandi að hægt sé að alhæfa að allt verði í lagi héðan af. Vonast Birgir til þess að þeir þættir sem hann breytir hjá sér verði líka lagaðir í öðrum húsum, „þannig að þetta verði öllum til hjálpar“.
„Við höldum bara áfram að vinna þetta og vonandi get ég gefið nákvæmari upplýsingar frá mér á næstunni. Ég vona að fólk gefi því skilning að það tekur tíma.“
„Það telst ekki mikið á tónleikum“
Spurður út í loftgæði og loftræstingarkerfi hallarinnar segist Birgir hafa bætt loftræstinguna fyrir tónleikana og hún hefði því verið í ágætis málum.
„Við erum með mæla og meðalhitinn í tveggja metra hæð var 22 gráður. Það telst ekki mikið á tónleikum.
Hins vegar, ef þú ert í banastuði og hleypur inn í fjöldann þá máttu alveg búast við því að finna hita frá næstu manneskju, þannig að þér getur fundist miklu heitara en það er í raun,“ segir Birgir, þetta aukist einnig þegar neytt sé áfengis.
„Allir þessir hlutir, sem tengdust loftgæðum og hita, það gekk allt eftir. Það var allt í ferli. Það eina sem brotnaði var stýring.“
Einungis sögusagnir um að gestir hefðu pissað á gólfið
Birgir leiðréttir að tónleikagestir hefðu ekki verið 10.000 talsins, raunar hefðu þeir verið um 8.600, miðað við þær tölur sem hann hefur fengið.
„Við höfum leyfi fyrir 11.000 manns að koma inn í húsið. Við gerum ráðstafanir sem taka á þessu en þarna fóru einhver öfl í gang sem urðu að mótstöðunni í tröppunum. Sem betur fer fór þetta betur.“
Á Facebook-hópnum beauty tips hafa notendur sagt frá því að aðgengi að salernum hefði verið nógu slæmt að einhverjir tónleikagestir hefðu pissað á gólfið. Þetta segir Birgir einungis sögusagnir sem hann hefur ekki enn fengið staðfestar.
„Við vorum með 22 manna lið í hreingerningum og enginn þeirra hefur sagt nokkuð um það. Það var hluti af því að tryggja öryggi að taka eins mikið til og hægt var, að byggja ekki upp einhver svæði sem yrðu hættuleg.“
Voru sem sagt nógu mörg salerni, að þínu mati, fyrir 8.600 manns?
„Sko, nú erum við að tala aðeins um tímalengd líka. Þarna hefði alltaf mátt bæta inn í. Það fer ekkert á milli mála. Það var bætt við útisalernum en Laugardalshöll er með 134 salernisaðstöður í húsinu. Síðan má rýna í það hvernig dreifingin er og hvernig tímalengdin er. Þetta er það sem við erum að greina.“
Spurður hvort þessar 134 salernisaðstöður séu allar opnar almenningi svarar Birgir að mögulega séu fjórar þeirra aðeins ætlaðar starfsfólki hússins.
Höllin getur tekið 11.000 manns
Þegar þú segir að það sé leyfi fyrir 11.000 manns í húsinu, áttu þá við þegar öll höllin er notuð?
„Þá er gert ráð fyrir 11.000 manns inni í sýningahöllinni, þar sem sjálfir tónleikarnir voru.
Gamla höllin, eins og við köllum hana – þar sem maturinn var – hún hefur leyfi fyrir 5.500 manns og sýningahöllin getur tekið 11.000 manns, en ekki á sama tíma.“
/frimg/1/57/14/1571447.jpg)
Öryggisfyrirtækið „alltaf staðið sig hingað til“
Hafið þið reynslu af öryggisfyrirtækinu Icelandic Security ehf.?
„Já, við höfum það. Hann hefur alltaf staðið sig hingað til. Þegar við tókum talið í upphafi þá treysti ég honum til að sinna sínu starfi alveg eins og hann hefur gert.“
Heimildir mbl.is herma að skilríki hafi ekki verið skoðuð við innganginn og að ekki hefði verið leitað nægilega vel á gestum við innkomu á tónleikana, en tveir voru handteknir á laugardagskvöldið á grun um vopnaburð.
Segist Birgir ekki ætla að fullyrða um hvernig ferlið fór fram en það sé annað sem hann eigi eftir að rýna í og „fara í gegnum hvern einasta þátt“.
„Við erum það hús sem hefur mesta reynslu í stóru viðburðahaldi. Starfsfólkið okkar hefur gríðarlega reynslu. Ég sjálfur hef unnið við þetta í fimmtán ár. Ég óska engum að lenda í þessu.“
„Hér voru allir á tánum“
Birgir ítrekar að mörg önnur atriði hefðu verið í lagi þegar troðningurinn var í gangi. Um 7.000 manns hefðu þá verið inni í salnum og ekki orðið varir við að nokkuð hefði komið upp á.
„Það var gert hlé á dagskránni. Næsta atriði var ekki sett í gang fyrr en það var búið að tryggja að það væri búið að leysa úr þessu. Þetta eru allt verkferlarnir sem komu í gegnum mig og minn aðstoðarmann sem var á staðnum.
Hefði því ekki verið fylgt – og þeim verkferlum sem við, ég, lögreglan, slökkviliðið og yfirmaður gæslunnar, tókum fund um strax eftir atvikið á laugardagskvöldið – hefði þetta getað farið verr. Hér voru allir á tánum.“
Þá segir Birgir ekki tímabært að segja hvað það er nákvæmlega sem hefði mátt fara betur í undirbúningsferlinu, „það á svo margt eftir að koma í ljós og mikið að fara yfir“.
„Við höfðum frábært samstarf bæði við lögreglu og slökkviliðið og með þeirra aðkomu þá náðum við stjórn á þessu.“
Verðmætin sem virðast leynast í Kviku
Íran muni verja „lögmæt réttindi“ sín
Skýrslutökur tengdar hvarfinu gengið vonum framar
Ný skýrsla grefur undan árangri árásarinnar
Fleiri hús frá víkingaöld á Íslandi
/frimg/1/57/73/1577319.jpg)
Gestir Versala geta nú átt samtöl við stytturnar
Erlendir þjóðarleiðtogar þakklátir Íslandi