Skriða féll í Neskaupstað og grjóthrun á Siglufirði

Hvorki varð tjón á mun­um né mönn­um vegna skriðufalls sem varð í Nes­kaupstað, eða vegna grjót­hruns á Siglu­fjarðar­vegi sem varð nú í kvöld. 

Þetta seg­ir Jó­hanna Malen Skúla­dótt­ir, nátt­úru­vár­sér­fræðing­ur á Veður­stofu Íslands, í sam­tali við mbl.is. 

„Þessi skriða sem féll í Nes­kaupstað var ótrú­lega lít­il og við höf­um ekki fengið fleiri til­kynn­ing­ar um skriður í kvöld. Ólafs­fjarðar­veg­ur og veg­ir þar í kring eru þó sér­stak­lega merkt­ir vegna grjót­hruns- og skriðuhættu. Þar þarf fólk að fara var­lega,“ seg­ir Jó­hanna. 

Veður­stof­an hef­ur gefið út viðvör­un vegna skriðuhættu og vatna­vaxta á norðan- og aust­an­verðu land­inu. Mesta úr­kom­an mun sam­kvæmt viðvör­un­inni falla á Trölla­skaga og á Flat­eyj­ar­skaga.

Jó­hanna seg­ir að eins og staðan sé núna sé ekki hætta á því að skriður muni falla í þétt­býli, hún seg­ir þó að viðvar­andi skriðuhætta sé til staðar og meta þurfa stöðuna með viðbragðsaðilum í fyrra­málið.

• Blogga um frétt