„Þetta er allt einhvern veginn að róast“

Í dag voru kallaðir út hóp­ar frá Slysa­varn­ar­fé­lag­inu Lands­björgu til að aðstoða bænd­ur á Norður­landi við að koma sauðfé í skjól og að aðstoða ferðamenn sem lent höfðu í vand­ræðum.

„Þetta er allt ein­hvern veg­inn að ró­ast,“ seg­ir Jón Þór Víg­lunds­son, upp­lýs­inga­full­trúi Lands­bjarg­ar. Hann tel­ur smöl­un í Skíðadal vera lokið en þar þurftu björg­un­ar­sveit­ar­menn að aðstoða bænd­ur við að koma fé sínu í skjól vegna mik­ill­ar snjó­komu og hvassviðris sem var á norðan­verðu og aust­an­verðu land­inu í nótt og dag.

„Það voru send­ir hóp­ar út í Flat­eyj­ar­dal og Fjörðum bara til þess að at­huga hvort að ein­hverj­ir væru þar. Land­eig­andi hafði orðið var við ein­hverja um­ferð þangað fyr­ir helgi svo það var bara verið að tékka hvort eitt­hvað ferðafólk væri þar í vand­ræðum út af færð,“ en Jón Þór hef­ur ekki heyrt niður­stöður þeirra at­hug­ana ennþá.

„Von­andi tek­ur þetta bara fljótt upp“

Jón Þór seg­ir ekki mikið meira vera að ger­ast í augna­blik­inu og það hafi ekki verið jafn mikið að gera eins og bú­ist var við miðað við spá.

Björg­un­ar­sveitar­fólk í snjó­kom­unni í Skíðadal. Ljós­mynd/​Lands­björg

„Þetta virðist hafa farið bet­ur. Ekki al­veg jafn mik­ill snjór kannski, þó hann hafi verið þónokk­ur þarna víða. Von­andi tek­ur þetta bara fljótt upp, ekki síst mó­fugl­anna vegna,“ seg­ir Jón Þór.

• Blogga um frétt