Dómur vegna tilraunar til manndráps mildaður
Setja bókamerki
Landsréttur dæmdi fyrr í dag Örn Geirdal Steinólfsson í fimm ára fangelsi fyrir tilraun til manndráps. Örn hafði áður verið dæmdur í sex ára fangelsi í héraðsdómi og hefur því Landsréttur mildað dóm hans.
Erni var einnig gert að greiða fórnarlambi árásarinnar 2,2 milljónir í miskabætur og fjórðung af áfrýjunarkostnaði.
Atvikið sem um ræðir átti sér stað í janúar í fyrra. Örn stakk þá mann á þrítugsaldri tvívegis á gatnamótum Hringbrautar og Hofsvallagötu.
Árásin átti sér stað eftir að Örn hafði verið á gangi á miðri götu og fórnarlamb árásarinnar hafði bent honum á það að það væri hættulegt. Örn brást við með því að stinga manninn tvívegis.
Maðurinn hlaut opin sár á brjóstkassa og á vinstri öxl vegna árásarinnar.
Hending ein að ekki fór verr
Örn bar fyrir sig minnisleysi bæði í héraðsdómi og í Landsrétti. Hann bar einnig fyrir sig neyðarvörn en á það var ekki fallist enda var talið ljóst að hann hefði veist að manninum og að ásetningur hans hafi verið sterkur og einbeittur.
Í dómi héraðsdóms er tekið fram að hending ein hafi ráðið því að ekki fór verr vegna stungunnar í brjóstkassann.
Áverkar mannsins á brjóstkassa voru taldir lífshættulegir og hlaut hann meðal annars loftbrjóst.
Langt frá fyrri brotum
Eins og áður segir var dómurinn mildaður í Landsrétti úr sex árum í fimm.
Héraðsdómur hafði litið til þess í dómi sínum að Örn átti sakaferil að baki. Landsréttur taldi hins vegar að sakaferill mannsins ætti ekki að hafa teljandi áhrif vegna þess að langur tími var liðinn frá þeim brotum sem maðurinn hafði áður verið dæmdur fyrir.
Landsréttur taldi því rétt að milda dóminn um eitt ár.
Bandaríkin sprengja í Íran
Meintur árásarmaður úrskurðaður í gæsluvarðhald
Bóndinn í Hvalfirði ekki sáttur við myndina
Bandaríkjunum verði svarað fyrir árásirnar
Gular viðvaranir taka gildi uppúr hádegi
Stuðlar eina úrræðið fyrir börn í geðrofi
Árásin mikið áhyggjuefni