„Þetta þarf að hafa einhverjar afleiðingar“
Setja bókamerki
Fjölnir Sæmundsson, formaður Landssambands lögreglumanna, segist hafa þungar áhyggjur af starfsumhverfi lögreglumanna á landinu. Þá grunar hann að mennirnir sem hótuðu lögreglumanni á heimili hans hafi verið hagnýttir af öðrum.
Greint hefur verið frá því að fjórir menn hafi verið handteknir aðfaranótt mánudags eftir að hafa mætt heim til lögreglumanns í Reykjavík vopnaðir hnífum.
Í samtali við mbl.is segir Fjölnir að málið sé í raun ekki einsdæmi, þótt ekki hafi áður heyrst að menn mæti vopnaðir heim til lögreglumanns. Hann vísar t.a.m. til þess þegar kveikt var í bíl lögreglumanns fyrir utan heimili hans.
Hann nefnir einnig dæmi frá Suðurnesjum, þar sem manneskja var ítrekað að fara heim til lögreglumanna og valda skemmdum á bílum þeirra, sem og lögreglubílum.
Fjölskyldur lögreglumanna og nágrannar í hættu
„Það sem við í landssambandinu og lögreglumenn almennt erum ósátt við er að það sé ekki ákært fyrir 106. grein hegningarlaga, þ.e. árás á opinberan starfsmann, heldur að það sé bara verið að ákæra fyrir skemmdarverk,“ segir Fjölnir.
Hann segir málið einnig alvarlegt að því leyti að lögreglumaðurinn búi í fjölbýlishúsi. Því sé í raun verið að leggja fullt af fólki í hættu.
„Það eru ekki bara lögreglumenn sem eru í hættu heldur þá kannski fyrst og fremst fjölskyldur þeirra og nágrannar. Þannig við lítum á þetta mjög alvarlegum augum í stjórn sambandsins og höfum þungar áhyggjur af þessu starfsumhverfi.“
Verða einnig fyrir árásum á samfélagsmiðlum
Þá segist Fjölnir einnig hafa áhyggjur af því hve margir lögreglumenn séu ekki skráðir með lögheimili í Þjóðskrá. Stór ástæða fyrir því sé að þeir séu að reyna að fela sig.
„Það býr til alls konar vandræði fyrir þá að vera ekki með skráð lögheimili, bara t.d. í samskiptum við kerfið.“
Jafnframt nefnir hann að lögreglumönnum sé gjarnan ráðlagt að vera ekki of mikið á samfélagsmiðlum en hann segir það reglulega gerast að einhver birti þar mynd af lögreglumanni og níði hann niður.
„Við túlkum þetta auðvitað líka sem árásir á þá og ég hvet þá alltaf til að kæra til Héraðssaksóknara ef þeir verða fyrir árás á samfélagsmiðlum. Það er verið að vega að æru þeirra.“
Mynstur farið að sjást á Norðurlöndum
„Ég hef nú líka áhyggjur af því að lögreglustarfið sé að breytast og þá hefur maður áhyggjur af því í leiðinni að fólk sækist ekki eftir því að verða lögreglumenn og snúi sér frekar að einhverju öðru,“ segir Fjölnir og nefnir að það mynstur hafi verið rætt á milli formanna norrænu lögreglufélaganna þegar þeir hittast.
„Svíarnir hafa haft miklar áhyggjur af þessu hjá sér, að færri og færri vilji starfa sem lögreglumenn – sérstaklega í þessum stórborgum.“
Það er mynstur seð er að sjást?
„Já, það er mynstur sem sést á Norðurlöndunum.“
Og þá hér heima væntanlega líka?
„Maður hefur verið að reyna að greina þetta hér. Mér fannst umsóknir detta aðeins niður en svo jukust þær aftur, þannig að við vitum þetta ekki alveg, kannski enn þá. Það tekur auðvitað smá tíma að sjá eitthvað mynstur. En maður óttast það,“ segir Fjölnir og bætir við:
„Svo hefur maður auðvitað líka áhyggjur af því að fjölskyldufólk bara hætti störfum í lögreglunni, að þau vilji ekki leggja þetta á sína fjölskyldu.“
Félagslega veik ungmenni sem auðvelt er að nota
Greint hefur verið frá því að mennirnir sem mættu heim til lögreglumannsins séu allir undir tvítugu og að sá yngsti sé aðeins 15 ára gamall. Heimildir fréttastofu Ríkisútvarpsins herma að hópurinn sé tengdur brotamanni sem lögreglumaðurinn hafði stöðvað tvisvar sinnum við umferðareftirlit. Þess ber þó að geta að umræða hefur verið um að börn séu hagnýtt af glæpahópum til að fremja afbrot.
Aðspurður hvort mögulega sé um þannig mál að ræða segist Fjölnir gruna það.
„Þar erum við bara með þetta vandamál að það eru einhverjir sem eru félagslega veikir í samfélaginu sem er auðvelt að nota.“
Hann segir það mynstur einnig hafa sést á Norðurlöndum, þ.e. að skipulögð glæpasamtök eða fólk í glæpum notfæri sér ungt, viðkvæmt fólk til að fremja afbrot og komi þannig í veg fyrir að vera sjálft á staðnum.
Verður að taka hart á þessu
Að lokum tekur Fjölnir fram að ákall landssambandsins og lögreglumanna sé að þeir sem ógna og hóta lögreglumönnum og skemma eigur þeirra skuli kærðir fyrir árás á opinbera starfsmenn.
„Ég held að svona stoppi ekki nema það sé tekið hart á þessu og að einstaklingar verði dæmdir fyrir þessar árásir. Þetta þarf að hafa einhverjar afleiðingar.“
Fjárfestingum þegar frestað víða um land
Tíðindin óvænt og vaxtalækkun ósennileg
Gripu krabbaþjófa í Geldinganesi
Nýjustu tölur áhyggjuefni og mikil vonbrigði
Lýsir miklum áhyggjum í bréfi til valkyrjanna
„Sjálfstæð blaðamennska ekki lengur möguleg“
Efa stórlega að Ísrael virði vopnahléið