17. júní þarf ekki að hafa pólitískt yfirbragð

Kristrún Frosta­dótt­ir for­sæt­is­ráðherra seg­ir í sam­tali við mbl.is að 17. júní skipti miklu máli fyr­ir sam­heldni ís­lensku þjóðar­inn­ar og að viðburður­inn þurfi ekki endi­lega að vera með póli­tískt yf­ir­bragð.

Kristrún seg­ir ástæðuna fyr­ir því að hún hafi boðið Höllu Tóm­as­dótt­ur, for­seta Íslands, að flytja hátíðarávarp í henn­ar stað, ein­fald­lega vera þá að 17. júní sé haf­inn yfir póli­tík. 

Frétt af mbl.is

Kristrún af­sal­ar sér hátíðarávarp­inu til Höllu

„Ég reyni auðvitað mitt besta til að vera for­sæt­is­ráðherra allr­ar þjóðar­inn­ar en það á það auðvitað alltaf til að lita svo­lítið þenn­an dag ef það eru ein­hver umræðuefni í sam­fé­lag­inu eða skipt­ar skoðanir um ákveðin mál,“ seg­ir Kristrún.

Kristrúnu finnst í góðu lagi að gefa póli­tík­inni smá frí þenn­an dag. „Við erum með þjóðhöfðingja sem er for­seti Íslands og mér finnst að þess­ir viðburðir þurfi ekki endi­lega að vera með póli­tískt yf­ir­bragð. Með því er ég ekki að gera lítið úr því að það er auðvitað póli­tík í öllu líf­inu og það er póli­tík á bakvið þenn­an dag og hvernig hann kom til. Þetta er til­raun til að breyta aðeins áferð dags­ins og von­andi geng­ur það vel.“

Til­laga Guðna ekki ólík skoðunum Kristrún­ar

Fyr­ir rúmu ári lagði Guðni Th. Jó­hann­es­son, fyrr­ver­andi for­seti Íslands, til nokkr­ar breyt­ing­ar sem mætti taka til skoðunar. Nefndi hann að í ljósi ein­stakr­ar stöðu í stjórn­skip­un og sam­fé­lag­inu væri við hæfi að for­seti Íslands flytti ávarp til þjóðar­inn­ar á Aust­ur­velli á þjóðhátíðardag­inn 17. júní, í stað for­sæt­is­ráðherra eins og venja hef­ur verið.

Þá benti Guðni á að vel færi á því að þjóðhöfðing­inn ætti trygg­an og form­leg­an sess í Þing­valla­bæn­um sem ný­verið var gerður upp en þurfi ekki að vera gest­ur á tign­um stað, til dæm­is þegar aðra þjóðhöfðingja ber að garði.

Frétt af mbl.is

Þingi frestað: Guðni ávarpaði þing­heim

Kristrún seg­ir ákvörðun sína ekki vera ólíka hug­mynd Guðna enda sé hún á þeirri skoðun að Íslend­ing­ar eigi þenn­an dag sam­an. „Mér finnst skipta máli að við get­um öll átt þenn­an dag sam­an og að all­ir Íslend­ing­ar geti komið sam­an og hafi áhuga á því að koma á þenn­an viðburð. Við get­um hafið þenn­an dag aðeins yfir stjórn­mál­in á hverj­um tíma og átt þetta sam­an óháð stétt, stöðu og póli­tísk­um skoðunum og þeim mál­efn­um sem eru í gangi hverju sinni.“

Íslenskt sam­fé­lag þurfi viðburði þar sem er samstaða

„Ég held að ís­lenskt sam­fé­lag þurfi á því að halda að við get­um verið með sem flesta viðburði þar sem er hrein samstaða. Ég lagði mikið upp úr því að allt skipu­lag varðandi þenn­an viðburð væri með þeim hætti að aðgengi al­menn­ings að hon­um væri hvað mest­ur,“ seg­ir Kristrún.

Viðburður­inn hafi síðastliðin ár verið fyr­ir hæ­stráðend­ur og mjög aflokaður, þó að það hafi ekki verið endi­lega verið vilj­andi gert. Kristrún vildi ekki að þjóðhátíðardag­ur Íslend­inga væri með þeim hætti.

Aðgengi al­menn­ings sem mest

„Ég ber mikla virðingu og fullt traust til þeirra sem eru að vinna að ör­ygg­is­gæslu og ör­ygg­is­mati og við þurf­um auðvitað að fylgja því. Það er samt sem áður líka aðeins hægt að breyta upp­röðun og fram­setn­ingu viðburðar­ins til að reyna að tryggja að aðgengi al­menn­ings verði svo til óhindrað,“ seg­ir Kristrún.

Aðspurð hvort for­seti Íslands komi til með að flytja hátíðarávarpið á kom­andi árum seg­ist Kristrún von­ast til þess að fólk sé ánægt með þær breyt­ing­ar.

„Við verðum að taka stöðuna og sjá hvort fólk sé ánægt með þetta. Ég vil fyrst og fremst að þjóðin fái viðburð sem þau geta tengt við. Von­andi geng­ur þetta vel og við get­um end­ur­tekið þetta á næstu árum.“

• Blogga um frétt