Innlent | Morgunblaðið | 2.7.2025 | 10:14

Heimaskólar barna á BUGL sinna kennslu

Brúarskóli við Dalbraut hefur séð um kennslu á BUGL síðastliðin ár en breytingar eru í vændum. mbl.is/Árni Sæberg

Heimaskóli í viðkomandi hverfi barns kemur til með að sinna kennslu barna sem eru á barna- og unglingageðdeild Landspítalans (BUGL) meðan á lögbundinni skólaskyldu þeirra stendur. Þetta segir Eva Bergþóra Guðbergsdóttir samskiptastjóri Reykjavíkurborgar í samtali við Morgunblaðið.

Brúarskóli við Dalbraut hefur annast sjúkrakennslu barna á meðan þau eru á BUGL en líkt og greint var frá í blaðinu á mánudag ákvað Reykjavíkurborg að loka starfsstöð skólans við Dalbraut. Landspítali vissi ekki af lokuninni fyrr en á föstudaginn í síðustu viku.

Mennta- og barnamálaráðuneytið hafði enga aðkomu að ákvörðun borgarinnar um lokunina en ráðuneytið hafði þó fundað um stöðu nemenda á framhaldsskólaaldri á BUGL. Ráðuneytið stefndi að því að fara betur yfir málið að loknu sumarleyfi. Þetta kom fram í skriflegu svari ráðuneytisins við fyrirspurn mbl.is í gær.

Eva Bergþóra Guðbergsdóttir segir í samtali við Morgunblaðið að þessar breytingar séu hluti af þróun borgarinnar þess efnis að heimaskólar barna á BUGL sinni sjúkrakennslu, eins og kveðið sé á um í grunnskólalögum. Hún segir breytingarnar enn vera í vinnslu hjá borginni.

Samkvæmt úttekt sem ráðgjafarfyrirtækið KPMG vann fyrir borgina árið 2023 var meðalnámstími nemenda á Dalbraut 3-4 vikur. Ein af ástæðunum fyrir því að ákveðið var að færa kennsluna frá Brúarskóla yfir í heimaskóla barnanna var að með því væri börnunum haldið í sínu daglega umhverfi og þau ekki tekin úr þeirri kennslu sem þau hefðu fengið.

Kannast ekki við uppsagnir

Öruggar heimildir Morgunblaðsins herma að uppsagnir starfsmannanna, sem voru tveir, hafi verið dregnar til baka á mánudaginn. Eftir því sem blaðið kemst næst eru þeir því ennþá starfsmenn Reykjavíkurborgar.

Ólafur Björnsson skólastjóri Brúarskóla segir í samtali við Morgunblaðið að engum hafi verið sagt upp en um ákveðnar skipulagsbreytingar sé að ræða. Ólafur gat ekki tjáð sig um hvort breytingar yrðu á störfum kennara starfsstöðvarinnar.

Borgin vildi ekki kannast við uppsagnirnar og sagði Hjördís Rut Sigurjónsdóttir, upplýsingafulltrúi skóla- og frístundasviðs Reykjavíkur, að um misskilning væri að ræða.

Þjónusta verði ekki rofin

Ekki er vitað hvernig fyrirkomulag skólaþjónustu á BUGL verður í haust en borgin ítrekar að þjónustan verði ekki rofin. Borgin muni áfram sinna þjónustu við börn í öðrum sveitarfélögum en ekki einungis reykvískum börnum eins og Eva hélt fram í frétt blaðsins á mánudag.

Steinn Jóhannsson, sviðsstjóri skóla- og frístundasviðs, hefur ekki viljað tjá sig um málið við Morgunblaðið síðustu daga.