KYNNING | 12.1.2024 | Uppfært 12:45

Hraðvirk verkjastilling án verkjalyfja

Axel Bragason, er klínískur dáleiðari og dáleiðslukennari sem hefur verið að þróa hraðvirka og einfalda verkjastillingu sem kallast HypnoFlash. mbl.is/Arnþór Birkisson

Axel Bragason, sjúkrafþjálfari, fimleikaþjálfari og kennari í klínískri dáleiðslu hjá Dáleiðsluskóla Íslands, segir dáleiðslu geta verið gott verkfæri til að lina langvarandi og tilfallandi verki eða losna við þá fyrir fullt og allt. Axel kynntist dáleiðslu fyrst þegar hann var 16 ára gamall og segist strax hafa áttað sig á hversu öflugt fyrirbæri hún er.

„Dulúðin sem lá yfir þessu fyrirbæri vakti áhuga minn og þá ekki nokkur leið að kynnast þessum leyndardómi hér á landi á þeim tíma. Ég féll alveg fyrir dáleiðslu og sá strax hversu mikill máttur og kraftur fylgir þessu stórkostlega verkfæri,“ segir Axel sem lærði grunntækni í meðferðardáleiðslu fyrir tólf árum og hóf framhaldsnám í dáleiðslufræðum strax í kjölfarið.

„Dáleiðsla nýtist öllum á einhvern hátt. Hvort sem það er í þeim tilgangi að bæta andlega og líkamlega heilsu eða til að bæta árangur í daglegu lífi, létta á eða eyða verkjum og sársauka, til að vera besta útgáfan af sjálfum sér, breyta hegðunar- og hugsanamynstri, til að sjálfs- og valdefla sig, eyða slæmum ávana, eða hvað sem er - möguleikarnir eru endalausir.“

Axel segir dáleiðslu geta gagnast öllum sem vilja bæta lífsgæði sín á einhvern hátt. mbl.is/Arnþór Birkisson

Verkirnir á bak og burt

Axel hefur verið að þróa aðferð sem kallast HypnoFlash og hefur aðstoðað ófáa verkjaþjáða einstaklinga við að stilla af hvers kyns verki og vinna bug á ýmsum hamlandi heilsufarskvillum. HypnoFlash er verkjastillandi meðferð þar sem dáleiðslutækni er beitt.

„Til að gera langa sögu stutta er HypnoFlash hraðvirk verkjastilling. Þetta er einföld og áhrifarík leið til að hafa áhrif á sársauka og verki af öllu tagi á fljótlegan og öruggan hátt. HypnoFlash er sennilega fljótlegasta aðferð innan dáleiðslunnar sem beita má til að minnka eða eyða einkennum sársaukafullra verkja á stað og stundu,“ lýsir Axel.

HypnoFlash-aðferðin getur linað langvarandi og tilfallandi verki eða eytt þeim fyrir fullt og allt. mbl.is/Arnþór Birkisson

Skjótvirk og einföld leið

Axel hefur um áratugaskeið notast við dáleiðsluaðferðir við störf sín og segir HypnoFlash-aðferðartæknina mjög áhrifaríka. Í gegnum tíðina hefur hann verið iðinn við að bæta við sig þekkingu og reynslu á sviði dáleiðslunnar til klínískra meðferða.

„Helstu kostir HypnoFlash eru þeir að þetta er bæði skjótvirk og einföld leið til að ná árangri og stuðla að bættri líðan,“ segir Axel.

„HypnoFlash er í raun verkjastilling sem hefur þá takmörkun á langvarandi verki að hún líður hjá á einhverjum tímapunkti. Svipað og um verkjalyf væri að ræða nema að verkjastilling á langvarandi verki getur varað frá einhverjum klukkustundum og upp í einhverja daga. Svo eru auðvitað engar aukaverkanir af HypnoFlash líkt og hlýst af notkun verkjalyfja og dáleiðsluferlið eins náttúrulegt og það verður.“

Þann 21. janúar, næstkomandi, heldur Axel fyrsta HypnoFlash-námskeiðið hér á landi. mbl.is/Arnþór Birkisson

Þú getur lært að verkjastilla þig og aðra

Axel segir HypnoFlash-aðferðina virka á aðeins nokkrum sekúndum og að hver sem er geti lært að tileinka sér hana.

„Það þarf hvorki sérstaka þekkingu né reynslu á sviði dáleiðslunnar til að geta lært HypnoFlash-verkjastillingu. Unnið er með annars konar tækni þegar um langvinna verki er að ræða en hins vegar getur HypnoFlash eytt tilfallandi verkjum alveg, fyrir fullt og allt,“ segir hann og nefnir í því samhengi verki á borð við höfuðverk, tíðaverki eða vaxtaverki hjá börnum en listinn er ótæmandi.

Hann segir námskeið í HypnoFlash geta gjörbreytt lífi margra en fyrsta námskeið í HypnoFlash-tækni á Íslandi verður kennt í húsnæði Dáleiðsluskóla Íslands, Víkurhvarfi 1, þann 21. janúar og er skráning hafin.

Axel hefur víðtæka þekkingu og reynslu af verkjum og verkjastillingu með dáleiðsluaðferðum. mbl.is/Arnþór Birkisson

„Námskeið í HypnoFlash er ætlað öllum þeim sem geta séð það fyrir sér að vera í aðstæðum þar sem þörf er á hraðvirkri verkjastillingu. Fyrir alla þá sem vilja getað hjálpað öðrum að losna við verki og sársauka á einfaldan og öruggan hátt.

Námskeiðið er einnig mjög góð leið til að öðlast innsýn í og skilning á þessu merkilega fyrirbæri sem við köllum dáleiðsla,“ segir Axel og hvetur áhugasama til að skrá sig á þetta magnaða námskeið.