Wellington er mjög vinsælt um jólin

 „Síðustu ár hefur það orðið meira áberandi að margir vilja frekar fá wellington eða lamb í matinn um jólin í staðinn fyrir hamborgarhrygg. Vissulega er fólk samt fastheldnara um jólin en til dæmis áramótin en þetta er greinilega hægt og rólega að breytast,“ segir Geir Rúnar Birgisson eigandi Kjötbúðarinnar sem sjálfur ákveður bara á aðfangadag hvað hann snæðir um jólin.  

„Þegar börnin voru yngri og bjuggu öll heima var algjör skylda að vera með hamborgarhrygg. Nú er þetta orðið þannig að ég ákveð eiginlega bara á aðfangadag hvað ég hef. Svo er það eins með mig og virðist vera almennt með landsmenn að um áramótin er ég mun opnari fyrir því hvað á að vera í matinn, til að mynda villibráð, hreindýr eða dádýr. Oft er fólk með fleiri tegundir í matinn um áramótin og ég blanda til dæmis oft saman wellington og villibráð.“

Það er mikið úrval í Kjötbúðinni en síðustu ár eru sífellt fleiri sem velja Wellington í matinn um jólin. mbl.is/Karítas

„Almennt hins vegar hefur nautasteik í wellington verið vinsælasta hráefnið um jólin og hamborgarhryggurinn er alltaf vinsæll þótt það hafi minnkað. Önnur vinsæl vara um jól og áramót eru fyllt lambalæri og lambahryggir, það hefur aukist töluvert að fólk hafi það í matinn. Grafið kjöt og paté er svo aftur á móti mjög vinsælt allan desember þótt það seljist mest af því um jól. Fólk er mikið með matarboð og jólahlaðborð í desember og þá er boðið upp á paté og grafið kjöt.“

Það er sífellt að verða vinsælla að velja aðra rétti en hamborgarhrygg í jólamatinn en hér má sjá fyllt lambakjöt sem má fá í Kjötbúðinni. Ljósmynd/Aðsend

Mikið úrval af tilbúnu meðlæti

Geir Rúnar talar um að þótt aðalrétturinn sé alltaf vinsælasta varan í Kjötbúðinni þá hafi aukist verulega að fólk kippi meðlætinu með sér þegar það kemur í verslunina. „Það hefur aukist verulega að fólk kaupi tilbúið meðlæti, sérstaklega waldorfsalatið, kartöfluréttina og síðast en alls ekki síst sósurnar. Við erum með sérstakar veislusósur sem við gerum bara fyrir jól og áramót og þær rokseljast á þessum tíma. Í raun erum við með heildarlausnina fyrir fólk; forrétti, aðalrétti og eftirrétti. Til að mynda erum við bæði með carpaccio eitt og sér og tilbúinn bakka með carpaccio, klettasalati, balsamikperlum og rifnum parmesanosti. Við viljum einfalda fólkið lífið eins og hægt er,“ segir Geir Rúnar og bætir við að stór hluti af því er vefverslun Kjötbúðarinnar.

Í Kjötbúðinni má líka fá tilbúna forrétti og carpaccio er alltaf vinsæll á veisluborðið, hvort sem er á jólunum eða í matarboðið í desember. Ljósmynd/Aðsend

„Um 90% af sölunni í kringum jólin fer fram á netinu í dag. Fólk er þegar byrjað að panta jólamatinn og í raun hófst það í lok nóvember. Það fer mikil sala fram núna á netinu, fólk vill vera búið að þessu svo það þurfi ekki að hugsa um þetta í annríkinu í desember.  Þá pantar fólk kjötið fyrirfram á vefsíðunni og sækir vörurnar svo bara á þeim degi sem það gefur upp og í þeirri verslun sem hentar en við erum með verslun á Grensásvegi og í Mosfellsbæ. Svo er vitanlega alltaf einhverjir sem vilja bara versla í búðinni, eða panta kannski á netinu og koma samdægurs að sækja.“

Það einfaldar töluvert lífið að grípa með sér tilbúið meðlæti og í Kjötbúðinni er mikið úrval af alls kyns meðlæti sem og forréttum og eftirréttum. mbl.is/Karítas

Vinsæl gjafakort og gjafakörfur

Aðspurður hvort það sé mest að gera á þessum árstíma í búðinni segir Geir Rúnar að svo sé. Þótt sumrin séu vissulega stór líka þá er langmesta salan í desember. „Það tekur okkur rúmlega mánuð að undirbúa fimm daga sölu. Þá erum við að grafa kjöt, búa til paté og þess háttar. Við sjáum líka um mjög mörg jólahlaðborð fyrir bæði einstaklinga og fyrirtæki í desember þannig að það er í raun ótrúlega mikið að gera allan desember,“ segir Geir Rúnar og bætir við að það sé líka töluverð sala í gjafakortum í Kjötbúðinni.

Það er mikið að gera í Kjötbúðinni í desember, bæði að undirbúa jólaösina og að undirbúa fjöldamörg jólahlaðborð fyrir fyrirtæki og einstaklinga. mbl.is/Karítas

„Gjafakortin hafa lengi verið mjög vinsæl hjá okkur og það er að aukast salan á þeim, kannski svolítið á kostnað jólakarfanna. Einstaklingar virðast í meira mæli kaupa gjafakort handa sínum nánustu þótt það séu alltaf einhver fyrirtæki sem kjósa að gefa gjafakort. Þrátt fyrir að gjafakortin verði sífellt vinsælli þá eru jólakörfurnar alltaf sígildar og vinsælar. Við erum með fimm staðlaðar jólakörfur sem kosta frá tíu þúsund krónum og upp í 35 þúsund krónur.

Svo setjum við sérstaklega upp körfur fyrir sum fyrirtæki og þá vilja þau bæta einhverju við, eins og vínflösku eða eitthvað þess háttar. Að megninu til eru þetta fyrirtæki sem kaupa körfur af okkur en síðustu fimm ár eða svo hefur fjölgað að einstaklingar kaupi körfur til að gefa börnunum sínum sem eru kannski eldri og eiga allt. Þannig er líka hægt að létta undir með jólamatinn og svo er oft erfitt að gefa sumum gjöf. Það kunna flestir að meta gott kjöt og meðlæti,“ segir Geir Rúnar að lokum.

Það er orðið vinsælt að panta jólamatinn á heimasíðu Kjötbúðarinnar en þar er hægt að velja afhendingardag sem og hvort varan sé sótt á Grensásveg eða í Mosfellsbæ. mbl.is/Karítas

• Blogga um frétt