Tækifæri framtíðarinnar

„Stjórnendur fyrirtækja verða í auknum mæli að leita leiða til þess að gera lærdóm að kjarnafærni í fyrirtækjum vegna þess að það er á þeirra ábyrgð að fyrirtæki staðni ekki eða verði úrelt. Þeir mega ekki verða flöskuháls á framfarir. Þeir þurfa sjálfir að vera fordæmi og fyrirmynd og vera tilbúnir til þess að grípa tækifæri framtíðarinnar,“ segir dr. Eyþór Ívar Jónsson forseti Akademias sem er sérfræðingur í stjórnun, stefnumótun og stjórnarháttum.

„Það er margt spennandi að gerast hjá Akademias. Við erum búin að útskrifa hátt í 500 manns á árinu sem senn er liðið úr löngu námslínunum okkar; leiðtoganáminu, míní-MBA og náminu viðurkenndir stjórnarmenn. Við vorum með útskrift rétt fyrir jól þar sem við útskrifuðum 16. hópinn úr viðurkenndum stjórnarmönnum og má því segja að við höfum gjörbreytt framboðinu á hæfu fólki til stjórnarstarfa á undanförnum árum,“ segir dr. Eyþór og bætir við að fyrstu Executive MBA-nemar Akademias muni útskrifast á vorönn. „Sveigjanleikinn og tengslanetið sem felst í náminu hefur algerlega slegið í gegn. Ég fullyrði að það getur enginn boðið upp á jafnöflugt tengslanet í íslensku atvinnulífi í gegnum nám eins og við með Executive MBA-náminu. Svo er þetta líka nám á heimsmælikvarða, allavega veit ég að við stöndum ekki höllum fæti í samanburði við MBA-námið í Viðskiptaháskólanum í Kaupmannahöfn (e. Copenhagen Business School).“

Sjálfur er dr. Eyþór aðstoðarforseti Evrópska stjórnunarskólans (e. European Academy of Management/EURAM) og hefur verið leiðandi í þróun á MBA og stjórnendanámi á Íslandi og Evrópu. Hann kenndi við Viðskiptaháskólann í kaupamannahöfn (e. Copenhagen Business School) og stýrði meðal annars nýsköpunar- og frumkvöðlastarfsemi í MBA-námi skólans í næstum tvo áratugi.

Akademias hefur verið að auka námsframboð sitt

Hvað ætlar þú að vera með nýtt og skemmtilegt á vorönn?

„Við erum í fyrsta skipti að gera tilraunir með að bjóða námskeið á ensku hjá okkur, enda fjölgar erlendum sérfræðingum og stjórnendum á Íslandi ár frá ári. Við ætlum að bjóða upp á fjögur námskeið núna á vorönn á ensku: Leader in Project Management, Leader in Business AI utilization, Scrum Master og Scrum Project Owner. Scrum námskeiðin eru einu námskeiðin á Íslandi sem veita alþjóðlega viðurkenningu í Scrum,“ segir dr. Eyþór.

Ný námskeið á vorönn Akademias eru til dæmis viðurkennd vefumsjón, viðskiptarammi – viðskiptamódel og -áætlanir, og leiðtogi í strategískri uppbyggingu vörumerkja. „Svo erum við búin að vera að prófa að keyra hraðlamódel en við bjóðum núna til dæmis upp á hraðal – 90 daga umbreytingu sem er náttúrlega frábær í byrjun á nýju ári og nýju lífi.“

Dr. Eyþór segir að leiðtogar Akademias sjái nú aukna áherslu á tilfinningagreind, hluttekningu og inngildingu sem lykilfærni stjórnenda. „Ásamt aukinni eftirspurn eftir námskeiðum um gervigreind, gögn og stafræna umbreytingu.“

Tilfinningagreind, hluttekning og samskiptafærni hafa lengi verið í forgrunni hjá Akademias. „Sérstaklega núna, þegar vinnumarkaðurinn kallar á sveigjanleika og aðlögunarhæfni, sjáum við að þessir þættir verða æ mikilvægari fyrir stjórnendur og leiðtoga. Stafræn hæfni og hæfni í gagnanotkun hafa einnig orðið ómissandi fyrir nútímaleiðtoga sem þurfa að taka upplýstar ákvarðanir í stafrænu umhverfi. Við höfum lengi lagt áherslu á leiðtogahlutverkið í stefnumótun og stjórnarháttum, sem á við núna þegar fyrirtæki takast á við óvissu og hraðar breytingar,“ segir hann.

Mikilvægt að læra að vinna með öðrum

Eyþór segir skýra breytingu á væntingum stjórnenda þegar kemur að námi. „Inngilding, tilfinningagreind og hluttekning hafa færst í forgrunn. Það er nú litið á þessi „mjúku fög“ sem nauðsynlegan hluta af stjórnendafærni. Við sjáum einnig vaxandi áhuga á millistjórnendum sem leita eftir að efla hæfni sína í samskiptum, verkefna- og teymisstjórnun. Málið er að fyrirtæki eru í auknum mæli byggð upp út frá teymum eða verkefnum, og þá þarf fólk að kunna að vinna með öðrum og geta búið til samvinnu sem skilar árangri. Vandamálið er að flestir kunna ekki að vinna í teymum vegna þess að þeir geta ekki sett sig í spor annarra eða skilja ekki að við erum ólík og það þarf að nýta og taka tillit til þess sem fólk kemur með að borðinu. Við erum sem dæmi að kynna nýtt nám á næsta ári sem leggur áherslu á stjórnanda sem þjálfara en það er byggt á hugmyndafræði sem er að ryðja sér til rúms í stjórnunarfræðum.“

Hvernig upplifir þú vinnumarkaðinn í gegnum nemendur þína og hvað geturðu sagt mér um skólalífið almennt?

„Ég held að við hjá Akademias höfum breytt viðhorfi hjá mörgum til menntunar og þjálfunar. Það er ekki lengur kvöð heldur skemmtun og tækifæri. Það hefur ótrúlegur fjöldi fólks komið til mín og sagt mér hvað það sé gaman að koma í Akademias og að það sé núna fyrst sem þau átta sig á að menntun getur verið frábær skemmtun.

Eins og sagði áður þá verður fólk að hugsa um símenntun sem leið til þess að komast áfram í viðskiptalífinu til lengri tíma. Við erum að sjá að vinnumarkaðurinn mun taka stórfelldum breytingum á næstu misserum. Tækni- og nýsköpunarfyrirtæki munu gera mörg fyrirtæki, sem við héldum að myndu lifa að eilífu, úrelt á mettíma. Fólk mun sjá að meðalstarfsaldur hjá fyrirtæki mun að öllum líkindum lækka hratt sem þýðir að fólk verður að huga að eigin getu og þekkingu, jafnvel að eigin vörumerki. Þetta hljómar illa í eyrum margra, en ég held hins vegar að þetta þýði líka að tækifærin muni margfaldast á næstu misserum,“ segir dr. Eyþór Ívar Jónsson forseti Akademias.

• Blogga um frétt