Opnunarhollið í Vatnsdalsá er að störfum. Aðstæður eru krefjandi en þrátt fyrir það hefur veiðimönnum gengið ágætlega. Í Vatnsdal voru komnir átta laxar í hádeginu og nokkrir voru misstir.
Vatnsdalsá hefur verið stórfljót nánast allan júní og oftar en ekki hefur áin verið lituð. Veiðin hófst síðdegis þann 20. þannig að í hádeginu var búið að veiða tvo heila daga. Átta laxar eru komnir á land og telst það fínn árangur, sérstaklega í ljósi aðstæðna. Við köllum þetta krefjandi aðstæður en vissulega mætti hafa stærri orð um stöðuna.
Hinn fornfrægi Hnausastrengur er nánast óveiðandi og er áin einn flaumur í gegnum hann. Í gærkvöldi var áin að taka á sig hefðbundið útlit en rausnarlegir veðurguðir gáfu í og bættu í rigninguna. Þegar aðstæður eru með þessum hætti að jarðvegur er gegnsósa skilar rigningarvatnið sér beint í ána og hún vex hratt. Það var líka raunin í morgun að hún var bólgin og lítt fallin til þess að leita að laxi.
Sex laxar voru komnir á land í gær og í morgun fékk Björn K. Rúnarsson leigutaki fisk í Úlfsfossi í Álku, hliðará Vatnsdalsár. Raunar setti hann í annan rétt ofan við brú og missti þann fisk.
Sturla Birgisson sjeff og leigutaki með Birni, fékk lax í Hólakvörn, sem hefur verið að gefa ágæta veiði í opnun. Þetta var sjötti laxinn sem veiðist þar.
Opnanir hafa verið erfiða á NV–landi í vor einmitt vegna þess sem rakið er hér að ofan. Þegar horft er í tölur er Vatnsdalsáin með flesta laxa í opnun. Víðidalsá var með sex eftir tvo og hálfan dag. Ásarnir með fjóra og Miðfjarðará með tólf laxa. Vissulega segja þessar opnanir ekki merkilega sögu varðandi sumarið en það er alltaf gaman þegar vel gengur. Vatnsdalsármenn njóta þess að vera að fá hann þrátt fyrir erfiðar aðstæður.
Lengd á laxi | Veiðisvæði | Veiðimaður | Dagsetning Dags. |
---|---|---|---|
100 cm | Blanda | Patrick Devennie | 20. júní 20.6. |
100 cm | Kjarrá | Sigurður Smári Gylfason | 19. júní 19.6. |
Veiðiárið 2023: | |||
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |