Veiðin í september verið óvenju erfið

Veiðin í september hefur verið með skrautlegasta móti. Síðasta vika geymdi víða daga sem voru óveiðandi sökum vatnavaxta og hávaða roks. Það sést líka á vikutölunum. Víða er mun meira af fiski í laxveiðiám en veiðin samt ekki betri en í fyrra. Sú prósentuaukning sem sést hefur milli ára hefur lækkað víðast hvar og er það fyrst og fremst vegna þess hve róleg veiðin hefur verið í september.

Ytri Rangá var með hörku veiði í síðustu viku eða rétt tæplega fjögur hundruð laxa. Það er lang besta veiðin á landinu í þessari viku. Ytri er að nálgast fjögur þúsund laxa og er að gefa mun betri veiði en í fyrra. Sama verður ekki sagt um Eystri en hún á enn svolítið eftir í tvö þúsund laxa. Stendur nú í tæplega 1800 löxum.

Þá fór Miðfjarðará upp fyrir Þverá/Kjarará og er því orðin aflahæsta náttúrulega laxveiðiáin á Íslandi eins og verið hefur síðustu ár. Mun betri veiði hefur verið í þeim báðum í sumar. Miðfjörðurinn er upp um 86 prósent milli ára og Þverá/Kjarará með aukningu upp á 71 prósent. Vikuveiðin í Miðfirðinum var 133 laxar þrátt fyrir krefjandi aðstæður.

Lokatölur eru teknar að berast og mun nokkrar ár loka í þeirri viku sem nú er að hefjast.

Hér er svo annar hængur í Vatnsdalsá í fyrsta stærðarflokki. Mældur 96 sentímetrar og veiddur í Vaðhvammi. Elías Níelsson, sem veiddi hann segir að þessi hafi verið á sterum. Það tók hann rúman klukkutíma að landa honum og Elías hefur tekist á við stærri fiska. Ljósmynd/EN

Hér er listi yfir tuttugu og tvær efstu árnar. Fyrsti dálkurinn er talan í viðkomandi á í lok dags, 18. september. Dálkur tvö, veiðin í fyrra segir til um hver talan var í loks dags 20. september í fyrra. Þriðji dálkurinn er svo veiðin vikuna 11. til 18. september, samkvæmt tölum frá angling.is sem er vefur Landssambands veiðifélaga. Fjórði og síðasti dálkurinn segir til um prósentubreytingu milli ára miðað við 19. september 2023 þar sem þær upplýsingar eru fáanlegar. Lokatölur, sem hafa borist eru feitletraðar.

Vatnasvæði          Í sumar          2023          Vikuveiðin    Breyting í %

Ytri–Rangá            3828             3133                394               --  

Miðfjarðará           2321              1273               133             86%

Þverá/Kjarará        2237             1306                 30             71%

Eystri–Rangá         1795             2204                153              --

Norðurá                1703             1087                 --             57% 

Selá í Vopnafirði     1349             1234                 --               9%

Langá á Mýrum      1184              663                  50             86%

Laxá í Dölum        1122             533                  39              --

Jökla                      1138             467                  59            146%

Hofsá                     1057            1088                  47             -3%

Laxá á Ásum           980               660                  37               --

Grímsá                 973               616                 52               --

Elliðaár                   938               625                 35             50%

Haffjarðará             802               905                 --               --

Laxá í Aðaldal         795                 685                44              16%

Víðidalsá                777                 599                23              29%

Laxá í Kjós             768                 448                 28              63%

Laxá í Leirársveit*  727                 454                 79               --

Urriðafoss              719*               701                  --               --

Stóra Laxá             671                 388                 52               --

Vatnsdalsá             595                 367                 22               --

Við skoðum fleiri ár á morgun og hvernig veiðin hefur gengið í þeim í september.

*Tölur frá 11. september.

**Tala frá 24. júlí.

• Blogga um frétt

Seinustu hundraðkallar sumarsins