Sögulegar sættir eftir 37 ár

Sögulegar sættir tókust og voru opinberaðar í gærkvöldi. Atvinnuveiðimaðurinn Árni Baldursson var þá formlega tekinn inn á nýjan leik og boðinn velkominn í Stangaveiðifélag Reykjavíkur. 37 ár eru liðin frá því að hann var rekinn úr félaginu fyrir þær sakir að bjóða á móti félaginu í Laxá í Kjós.

„Já. Ég var rekinn úr félaginu. Ekki einu sinni heldur tvisvar. Framkvæmdastjórinn félagsins kom heim til mín með bréf þar sem mér var tilkynnt um brottvikninguna. Ég svaraði þessu bréfi ekki. Framkvæmdastjórinn mætti þá aftur viku síðar með annað bréf með sama erindi og vildi fullvissa sig um að ég skildi stöðuna,“ upplýsti Árni Baldursson í samtali við Sporðaköst.

Heilar sættir hafa tekist og er Árni Baldursson á nýjan leik orðinn meðlimur í SVFR, eftir „37 ára útlegð,“ eins og hann kallar það. Hann var gestur á opnu kvöldi félagsins í gær og fór þar yfir söguna og hlífði hvorki sér né félaginu.

Jólin eru hátíð ljóss og friðar. Sá andi sveif yfir vötnum á opnu húsi hjá SVFR í gærkvöldi. Nýjasti meðlimurinn, Árni Baldursson ávarpar samkomuna. Ljósmynd/DH

Ingimundur Bergsson sem nú er framkvæmastjóri félagsins bauð Árna formlega velkominn og féllust menn í faðma. „Hann flutti frábæra ræðu þar sem hann fór yfir sögu sína sem ungur veiðimaður og sögu sína og Stangó. Okkur þótti öllum vænt um þetta kvöld,“ sagði Ingimundur Bergsson, framkvæmastjóri SVFR í samtali við Sporðaköst.

Árni nýtti svo tækifærið og kynnti bókina sína Í veiði með Árna Bald og hlaut hann góðar viðtökur.

• Blogga um frétt

Seinustu hundraðkallar sumarsins