Átta buðu í Litluá í Kelduhverfi

Átta aðilar sendu inn samtals níu tilboð í veiðirétt í Litluá í Kelduhverfi. Mikill munur var á tilboðunum og hlupu þau á ríflega fimmtíu milljónum króna upp í 125,7 milljónir fyrir svæðið í samtals fimm ár.

Veiðifélag Litluárvatna óskaði eftir tilboðum á öllum veiðirétti félagsins í Litluá og Skjálftavatni í Kelduhverfi fyrir veiðitímabil áranna frá 2026 til og með 2030.

Tilboðsfrestur rann út í dag og voru tilboð opnuð á skrifstofu Landssambands veiðifélaga í dag. Stangaveiðifélag Reykjavíkur bauð upp á umboðssölu og sama má segja um Fish Partner og félagið R&R sem Kristinn hjá veiða.is er á bak við. 

RogM bauð 125,7 milljónir. Á bak við það tilboð er Matthías Þór Hákonarson sem meðal annars er með Mýrarkvísl á leigu.

Frétt af mbl.is

Litlaá og Skjálftavatn í útboð

Hópurinn Við lækinn bauð 115,5 milljónir. Þar á bak við er Björn K. Rúnarsson sem er einn af leigutökum Vatnsdalsár.

Flyfishing in Iceland var með 110 milljónir.

Fish Partner bauð 105 milljónir krónar

Hópurinn Litluárvinir sem leiddur er af Þórarni Blöndal bauð 100 milljónir.

Loks bauð félagið Seyrur rúmlega 51 milljón.

Nú mun veiðifélagið fara yfir tilboðin en kveðið var á um í auglýsingu að veiðifélagið áskilur sér rétt til að taka hvaða tilboði sem er og hafna öllum.

Ný leigutaki, væntanlega úr þessum hópi mun taka við svæðinu á næsta ári. 

Leiðrétting

Í upphaflegu fréttinni var sagt að Pálmi Gunnarsson leiddi hópinn Litluárvinir. Hið rétta er að driffjöðurin í hópnum er Þórarinn Blöndal, þó að Pálmi sé vissulega hluti af hópnum. Leiðréttist þetta hér með.

• Blogga um frétt

Seinustu hundraðkallar sumarsins