Bleikjuáin sem breyttist í sjóbirtingsá

Eyja­fjarðará hef­ur síðustu ár styrkt sig í sessi sem afar áhuga­verð sjó­birt­ingsá. Segja má að þær breyt­ing­ar sem hafa orðið á landsvísu, þar sem bleikja hef­ur átt und­ir högg að sækja og sjó­birt­ing­ur verið að efl­ast hafi held­ur bet­ur komið skýrt fram í Eyja­fjarðaránni.

Áin opnaði á mánu­dag og hef­ur byrj­un­in verið hreint ágæt, að sögn þeirra sem hafa veitt fyrstu dag­ana. Snjó­koma fyrri hluta dags í gær gerði það að verk­um að menn voru ekki að flýta sér og hófu ekki veiðar fyrr en eft­ir há­degi. Opn­un­ar­dag­ur­inn hafði gefið ágæt­lega og var um þrjá­tíu birt­ing­um landað á mánu­dag. Leiðsögu­menn úr Vopnafirði eru fyrsta holl í ánni. Síðari hluta dags í gær hlýnaði og tók upp snjó. Þá rifu veiðimenn sig upp úr sjón­varps­glápi og héldu til veiða.

Birt­ing­arn­ir í Eyja­fjarðará eru svipaðir og þeir sem sjá má í Hús­eyj­arkvísl­inni. Þykk­ir og kraft­mikl­ir fisk­ar. Stefán Hrafns­son heilsaði upp á þenn­an. Ljós­mynd/​Denni

Fisk­ur var vel dreifður og voru þeir setja í birt­inga víða. Sveinn Björns­son, Denni lenti í fjöri niður á svæði eitt sem er að mati þeirra sem vel þekkja til frek­ar óal­gengt í byrj­un apríl, en þykir vita á gott. „Já, við fór­um ekki af stað fyrr en eft­ir há­degi. Það var byl­ur fram að há­degi en seinnipart­ur­inn var fínn. Við feng­um ein­hverja tutt­ugu birt­inga og allt upp í átta­tíu sentí­metra,“ sagði Stefán Hrafns­son í sam­tali við Sporðaköst.

Birk­ir Mar Harðars­son með fal­legt ein­tak. Veiðistaður­inn heit­ir Stóri Ham­ar. Loks­ins er veiðitíma­bilið komið af stað. Hjá Birki verður langt tíma­bil og mikið af leiðsögn framund­an. Ljós­mynd/​Hugó Bend­er

Jón Gunn­ar Benja­míns­son sem hef­ur átt sæti í stjórn Veiðifé­lags Eyja­fjarðarár staðfesti í sam­tali við Sporðaköst að ásókn í sjó­birt­ing­inn í ánni hefði verið að aukast jafnt og þétt síðustu ár. Þannig er apríl mánuður nán­ast upp­seld­ur. „Þetta er orðin aðal sölu­var­an hjá okk­ur, myndi ég segja. Við erum að fá veiðimenn ár­lega er­lend­is frá til að veiða sjó­birt­ing. Það þekkt­ist ekki í Eyja­fjarðará áður fyrr,“ upp­lýsti Jón Gunn­ar aðspurður hvort áhug­inn á birt­ingn­um hefði verið að aukast.

Vissu­lega er bleikj­an enn til staðar í Eyja­fjarðará en eins og Jón Gunn­ar seg­ir þá hef­ur hún mátt muna sinn fíf­il feg­urri. Hér áður fyrr var stór­bleikja henn­ar aðal vörumerki. Hún gaf á hverju ári mikið magn af bleikj­um fimm pund og upp úr. Hvort sá tími kem­ur aft­ur er ómögu­legt að segja til um.

• Blogga um frétt

Sein­ustu hundraðkall­ar sum­ars­ins