Veiði | mbl | 22.5.2025 | 21:16

Blöndubændur bjartsýnir á sumarið

Langidalur sem Blanda liðast um. Lónið er nánast fullt og yfirfall yfirvofandi. Guðmundur Haukur varaformaður veiðifélagsins telur ekki ástæðu til að hafa áhyggjur. Sagan sýni það. www.mats.is

Yfirborð Blöndulóns gutlar nú nánast við efstu mörk stíflumannvirkja. Einungis vantar fimm sentímetra upp á að yfirfall verði. Guðmundur Haukur Jakobsson varaformaður Veiðifélags Blöndu og Svartár segir ekki ástæðu til að hafa miklar áhyggjur af stöðunni og er þá að horfa til laxveiðitímabilsins sem er handan við mánaðamót. Þykir Guðmundi Hauki að skrif Sporðakasta um að hætta væri á að Blanda yrði illveiðanleg í sumar, væri orðum aukið.

„Við áttum fund með Landsvirkjun og fórum yfir stöðuna á vatnshæð lónsins og komandi veiðisumri. Starfsmenn Landsvirkjunar sögðu að útlitið væri ekki eins slæmt og menn hafa áhyggjur af gagnvart yfirfalli og því til staðfestingar fóru þeir yfir töluleg gögn og staðreyndir í gegn um tíðina varðandi sögu vatnshæðar í lóninu. Þeir sögðu að líklega yrði þetta ár sambærilegt 2006 – 2007 þar sem hækkaði verulega í lóninu snemma og datt svo niður þegar snjóbráð var lokið. Þó svo spár geri ráð fyrir að lónið fari á yfirfall á næstu dögum, þá er það ekki eins og yfirfall vegna jökulbráðnunar heldur er talið að það muni verða frekar lítið og dreitla rétt yfir stífluna í stuttan tíma og fari svo af yfirfalli aftur. Snjóbráð er nánast lokið í forðabúri Blöndu þannig að menn þurfa ekki að fara úr límingunum strax,“ upplýsti Guðmundur Haukur í samtali við Sporðaköst.

Hér má sjá vatnshæð Blöndulóns í gegnum árin. Sérstök áhersla er á þau ár þar sem staða lónsins var með svipuðum hætti og í ár. Miklir hagsmunir eru undir. Veðurguðirnir verða í aðalhlutverki þegar kemur að mögulegu yfirfalli. Lónið er núna við það að verða smekkfullt. Ljósmynd/Landsvirkjun

Hann segir að starfsmenn Landsvirkjunar hafi farið yfir sögulega stöðu lónsins síðustu 25 árin þar sem sjá megi að þetta er ekki fyrsta vorið þar sem Blöndulón er fullt og við það fara á yfirfall. Í fundargerð frá árinu 2003 kemur fram að þá voru mjög svipaðar aðstæður og nú er. Fram kom einnig að sögulegt yfirfall í júní þekktist ekki og bendir allt til þess að Blöndulón standi í stað eða lækki í júní og að yfirfall kæmi ekki fyrr en jökulbráðnun byrjaði. Oft byrjar jökulbráðnun um miðjan júlí og miðað við það segir Guðmundur Haukur að reikna megi með því að lónið fyllist í lok júlí eða byrjun ágúst. Segist hann telja þetta vera líklegustu sviðsmyndina í sumar eftir samtöl við Landsvirkjun. Vissulega væri staðan í sögulegu hámarki þetta vorið.

Guðmundur Haukur Jakobsson, varaformaður Veiðifélags Blöndu og Svartár. mbl.is/Hákon

„Blöndustöð er nú keyrð á fullum afköstum eða 150MW sem gæti seinkað yfirfalli og gæti jafnvel lækkað eitthvað vatnshæð í lóninu þegar kólnar í veðri. Síðustu daga hefur hitastig verið um 20˚C og því mikil bráðnun á þeim snjó sem eftir er á vatnasvæði Blöndu. Rennsli í gegnum stöð er nú 62m³/sek. og verður það til 26. maí en þann dag verður vél tvö stöðvuð vegna viðhalds. Eftir þann dag verður framleiðsla 100MW og flæðið rúmlega 40m³/sek.

Það sem verður mjög áhugavert að fylgjast með er að mínu mati, hvenær fiskurinn mætir þar sem svona mikið rennsli hefur ekki verið í Blöndu í aðdraganda veiðitímabils í þó nokkra tíð, minnugur þess að snemma veiðitímabils 2015 kom í ána töluvert flóð snemma í júní og þá fylltist áin af fiski. Það er að sjálfsögðu veiðivonin sem dregur mann á bakkann og ekkert er jafn skemmtileg og að setja í alvöru Blöndulax. Ég geri ráð fyrir að það verði upptaktur og góð mæting af tveggja ára laxinum,“ sagði Guðmundur Haukur að lokum.

Vissulega verður spennandi að fylgjast með opnun í Blöndu og þá sérstaklega í ljósi þess að smálax í flestum ám var mun meiri í fyrra en nokkur ár þar á undan. Það er iðulega ávísun á tveggja ára laxinn mæti í meira mæli og hann er alltaf fyrr á ferðinni en smálaxinn.

Ef við skoðum veiðitölur þau ár sem þar sem Blöndulón hefur verið í svipaðri stöðu að vori má sjá ýmsar útgáfur.

2003 gaf 504 laxa

2004 gaf 1386 laxa

2007 gaf 1117 laxa

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
100 cm	Sandá í Þistilfirði	Eiður Pétursson	24. júní 24.6.
Veiðiárið 2024:
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.