Mikki aftur með fyrsta lax sumarsins

Fyrsti lax sum­ars­ins veidd­ist áðan á svæðinu Skugga, þar sem Grímsá mæt­ir Hvítá í Borg­ar­f­irði. Lax­inn veiddi Mika­el Marinó Ri­vera, grunn­skóla­kenn­ari í Rima­skóla og góðkunn­ingi Sporðak­asta. Mikki, eins og hann er kallaður leik­ur þenn­an leik annað árið í röð. Hann veiddi líka fyrsta lax sum­ars­ins 2024 og það í Skugga.

„Við byrjuðum í morg­un og byrjuðum efst og veidd­um okk­ur niður. Ottó fé­lagi minn reisti fisk rétt þegar við vor­um að hætta og vor­um komn­ir á neðsta veiðistaðinn. Eft­ir mat­inn fór­um við beint þangað og í þrígang elti hann flug­una hjá mér. Ottó sá svo vel þegar hann var að skoða hana og kall­ar til mín að hann sé að elta og þá negldi hann flug­una. Því­lík­ur kraft­ur,“ sagði Mika­el í sam­tali við Sporðaköst skömmu eft­ir að þessi fyrst lax sum­ars­ins 2025 var kom­inn á land. 

Veiðistaður­inn, þar sem sá fyrsti veidd­ist í ár. Þetta er neðsti veiðistaður­inn áður en Grímsá fell­ur í faðm Hvítár. Ljós­mynd/​Mika­el Marinó

„Ótrú­lega þykk­ur og vel hald­in hrygna sem mæld­ist 82 sentí­metr­ar.“ Það verður of­ur­lítið snúið fyr­ir Mikka að út­skýra fyr­ir nem­end­um sín­um að hann skyldi veiða fyrsta lax­inn. Eins og við greind­um frá er veiðidraum­ur í gangi í Rima­skóla og hann er að fara með hóp­inn eft­ir tvo daga í Skugga. 

Frétt af mbl.is

Fyrsti lax sum­ars­ins kom­inn á land

Þetta gerðist ein­mitt í fyrra líka. Mikki var með nem­end­ur í Skugga og fisk­ur hafði verið að elta en tók ekki. Mikki tók þá stöng­ina og setti í lax mjög fljót­lega.

Silf­ur­bjart­ur. Eins nýr og þeir verða. Hrygna 82 sentí­metr­ar. Ljós­mynd/​Mika­el Marinó

Flug­an sem lax­inn tók er nafn­laus og ættuð frá eig­in­manni sam­kenn­ara í Rima­skóla. Sam­kenn­ar­inn mætti með flugu­box til Mikka og skila­boð fylgdu með að prófa þess­ar. „Flug­an er nafn­laus. Ætli við skír­um hana ekki bara Írisi í höfuðið á sam­kenn­ara mín­um,“ stakk Mikki upp á.

Viður­eign­in tók dágóða stund og giskaði Mikki á þetta hefði verið um tutt­ugu mín­út­ur þar til Ottó fé­lagi hans háfaði lax­inn. „Var háf­un á heims­mæli­kv­arða,“ upp­lýsti Mikki.

Þetta er flug­an sem vænt­an­lega fær nafnið Íris. Hún er upp­haf­lega hönnuð fyr­ir Veiðivötn en lax­inn vissi það ekki. Ljós­mynd/​Mika­el Marinó

Veiðisum­arið 2025 er þar með form­lega byrjað og startað aðeins fyrr, eins og í fyrra og það af sama manni á sama stað.

• Blogga um frétt

Sein­ustu hundraðkall­ar sum­ars­ins