Búbblur á bakkanum í góðri opnun Þjórsár

Óhætt er að segja að opn­un­in í Urriðafossi í Þjórsá hafi staðið und­ir vænt­ing­um. Sam­tals komu á land tólf lax­ar og er það góður opn­un­ar­dag­ur. Stærsti lax dags­ins var 96 sentí­metra hæng­ur. Það var stemm­ing við foss­inn í dag og nestið var ríku­legt í takt við þenn­an fyrsta dag laxveiðisum­ars­ins.

Stund­vís­lega klukk­an átta var kastað upp á hver myndi byrja hvar. Niðurstaðan varð sú að Stefán Sig­urðsson, leigutaki byrjaði í Lækj­ar­látri og Har­ald­ur Ein­ars­son, land­eig­andi fór í Huldu. Aðstæður til veiða voru frek­ar krefj­andi. Það var minna vatns­magn í Þjórsá en oft á þess­um tíma. Ekki að áin hafi ekki mik­il enda blikna þær flest­ar í sam­an­b­urði við jök­ulána. En þegar vatn er með minna móti er göngu­leið lax­ins fjær land­inu. Það er ekki vaðið í Þjórsá. Það er fyrsta regla.

Matth­ías Stef­áns­son með stærsta fisk dags­ins. Hæng­ur upp á 96 sentí­metra. Magnaður fisk­ur. Matth­ías sleppti þess­um. Ljós­mynd/​Harpa

Stefán var fyrst­ur á veiðistað og með tvo vold­uga skoska ánamaðka á öngl­in­um renndi hann með þrem­ur sökk­um í Lækj­ar­lát­ur. Í þessu fyrsta rennsli sum­ars­ins kom hann fljótt að holu sem er neðst í látr­inu. Þar mátti sjá stang­ar­topp tifa og svo taka nokk­ur högg úr djúp­inu. Hann var við það.

Stefán leit til viðstaddra og kinkaði kolli. Svo lagði hann stöng­ina til aust­urs og setti í hann. Fyrsta lax sum­ars­ins. Hon­um var landað og Har­ald­ur Ein­ars­son var mætt­ur með háfinn. Hrygna 76 sentí­metr­ar og þykk eins og stæðilegt karl­mannslæri. Þarna var hinn marg­frægi ís brot­inn.

Stærsti lax­inn var 96 sentí­metra hæng­ur

Harpa Hlín Þórðardótt­ir og Stefán Sig­urðsson eru með fyr­ir­tækið Ice­land Out­fitters sem er meðal ann­ars með Urriðafoss á leigu. Á móti þeim voru svo land­eig­end­urn­ir og bænd­urn­ir Har­ald­ur Ein­ars­son og Birna Harðardótt­ir. Fimmti maður var Matth­ías Stef­áns­son leiðsögumaður. Fisk­ar sáust skvetta sér í Huldu og þeir voru frek­ar langt úti fyr­ir maðkar­ennsli. Flot­holt var græjað til að koma þessu á rétt­an stað og halda því þar.

Opn­un­ar­hollið. Frá vinstri: Birna Harðardótt­ir og Har­ald­ur Ein­ars­son, land­eig­end­ur og svo Stefán Sig­urðsson og Harpa Hlín ásamt Matth­íasi. Ljós­mynd/​Sporðaköst

Áður en dró til tíðinda var boðið upp á sam­lok­ur, sæta Rice krispís köku­mola og ein­hverja holl­ustu í ætt við kíja­fræ og slík­an bræðing. Kon­urn­ar gerðu gott bet­ur og kampa­víns­flaska var opnuð og freyddi vel. Þær skáluðu veiðikon­ur, en afþökkuðu ábót. Það var veiðihug­ur í þeim. Svo var sett í ann­an lax það var í Huld­unni og flot­holtið gerði gæfumun­inn. Bleikt flot­holt. Stefán landaði 80 sentí­metra hrygnu. Þykk­ur og flott­ur fisk­ur. Harpa um svipað leiti setti í lax í látr­inu en hann slapp í lönd­un. Hún skellti sér strax út aft­ur og setti í ann­an með það sama. Hrygna 74 sentí­metr­ar. Ekki löng en þykk og sam­svaraði sér ein­stak­lega vel.

Stefán mynd­ar Hörpu með glæsi­lega hrygnu. Ljós­mynd/​Sporðaköst

Matth­ías missti fisk og landaði svo nokkru síðar fyrsta hængn­um. Gerðarleg­ur og mæld­ist 83 sentí­metr­ar. Þannig skilaði fyrri vakt­in fimm fisk­um. Seinni vakt­in gaf svo aft­ur á móti sjö fiska og ein­hverj­ir misst­ust. Það vakti sér­staka at­hygli og ánægju að 96 sentí­metra hæng­ur kom á land og þann flotta fisk fékk Matth­ías. Eft­ir snarpa viður­eign fékk hann frelsi á nýj­an leik og mun því að óbreyttu halda áfram ferð sinni upp Þjórsá.

Það hafa veiðst fleiri fisk­ar á opn­un­ar­degi í Urriðafossi en miðað við aðstæður sem lýst hef­ur verið hér telst þessi dag­ur standa und­ir vænt­ing­um. Hrygn­ur voru í mikl­um meiri­hluta í afl­an­um en tveir stór­ir hæng­ar voru skrautið á kök­una. 

• Blogga um frétt

Sein­ustu hundraðkall­ar sum­ars­ins