Snjóaði yfir veiðitúrinn annað árið í röð

Annað árið í röð snjóaði yfir Pét­ur Pét­urs­son og fé­laga sem eru við veiðar í Laxá í Mý­vatns­sveit. Pét­ur vaknaði við al­hvíta jörð og lítt fýsi­leg­ar aðstæður. „Einn og hálf­ur dag­ur í Laxá í Mý fæst ódýrt. Áhuga­sam­ir hafi sam­band í einka­skila­boðum,“ skrifaði Pét­ur á face­booksíðu sína. Hann lét fylgja með mynd­ir af ástand­inu. Snjór yfir öllu. Mó­fugl­inn átta­villt­ur og tals­vert verk að skafa framrúðu.

„Nei. Þú ert sá fyrsti sem hef­ur sam­band,“ hló Pét­ur þegar Sporðaköst hringdu og viltu vita hvort mik­il eft­ir­spurn væri eft­ir veiðileyf­inu.

Að öllu gamni slepptu þá sagði Pét­ur þetta með hrein­um ólík­ind­um. „Annað árið í röð sem við lend­um í þessu og í þriðja skipti á tíu árum,“ upp­lýsti hann.

Hér er ráðvillt­ur mó­fugl að velta fyr­ir sér í hverju hann sé eig­in­lega lent­ur. Ljós­mynd/​Pét­ur Pét­urs­son

Veiðin hef­ur farið vel af stað fyr­ir norðan og þeir fé­lag­ar voru að gera fína og hefðbundna veiði í grænni sum­ar­nátt­úru fyrsta einn og hálfa dag­inn. Þeir vissu svo sem af spánni en það er alltaf jafn skrítið að líta út um glugga í júní og allt er orðið hvítt.

„Spá­in var ekk­ert góð en hann hékk í lagi fram eft­ir kvöldi í gær. Það fór að snjóa ein­hvern tíma í nótt. Við fór­um að sofa í auðu og vöknuðum svo við hvíta jörð og sung­um bara jóla­lög. Það er svo gott sem al­hvít jörð. Maður er að labba hér um í nátt­úr­unni á góðum degi og er mjög meðvitaður um að víða eru hreiður og það þarf að passa sig á að stíga ekki á þau. Ég labbaði fram á önd í gær með nokk­ur egg í hreiðri. Það verður vænt­an­lega ekk­ert úr þeim. Svo sér maður mó­fugl­ana hér vappa um í reiðileysi og vita ekk­ert hvað þeir eiga að gera. Þetta er samt alls ekki jafn slæmt og fyrra. Þá skóf í skafla en nú er þetta blaut­ari snjór og minna. Við vor­um því sem næst að moka okk­ur út úr veiðihús­inu í fyrra.“

Vera eða fara? Það er stóra spurn­ing­in. Enn var að hríða í há­deg­inu. Ljós­mynd/​Pét­ur Pét­urs­son

Pét­ur og hluti hóps­ins var byrjaður að taka sam­an búnað og ganga frá fyr­ir snemm­búna brott­för. Ekki þó all­ir. Ein­hverj­ir ætluðu að sjá aðeins til og von­ast eft­ir gráðu upp á við eða jafn­vel tveim­ur. Það verður þó vissu­lega skít­kalt og frek­ar hvasst. Það þarf mik­inn áhuga og allt að því krón­ísk­an til að standa klukku­tím­um sam­an úti í þess­um aðstæðum og lopp­inn á fingr­um reglu­lega að skipta um flug­ur. Kuldakastið lif­ir nefni­lega góðu lífi fyr­ir norðan fram á helgi. 8. júní lít­ur veður­kortið bet­ur út. Um þrjár gráður á há­degi, slydda eða rign­ing og norðan­átt­in ekki að flýta sér. Þrír metr­ar á sek­úndu.

En já það voru ekki all­ir til­bún­ir að gef­ast upp. Hrafn Ágústs­son, Cadd­is­bróðir ætl­ar út en sagði í sam­tali við Sporðaköst, „Aðeins að leyfa hríðinni að ró­ast.“ Það var sem sagt enn ofan­koma í há­deg­inu. 

Ísland er land um­skipta þegar veður er ann­ars veg­ar. Svona var staðan í gær. Sum­ar og græn­ir bakk­ar. Ljós­mynd/​Pét­ur Pét­urs­son

Og hvað er hann að taka við þess­ar aðstæður spurðum við sér­fræðing­inn.

„Það er eng­in hríð ofan í ánni. Þannig að hann tek­ur bara þetta hefðbundna ef maður kem­ur því út í,“ upp­lýsti Hrafn.

Nú leggja menn á vog­ar­skál­ar skyn­semi, veiðiá­huga og vilja og niður­stöður verða alla­vega. En það er alltaf von ef menn treysta sér í rokið og kuld­ann. Svo er það sjón­ar­miðið, að þetta þurfi að vera skemmti­legt.

• Blogga um frétt

Sein­ustu hundraðkall­ar sum­ars­ins