Reynir og Árni komu Blöndu á blað

Fyrsti lax­inn í Blöndu veidd­ist áðan á Breiðu suður. Blönd­u­sér­fræðing­arn­ir Árni Bald­urs­son og Reyn­ir Sig­munds­son hafa aldrei núllað í opn­un í Blöndu og það breytt­ist ekki núna.

Fyrst fór Árni Bald­urs­son út og setti fljót­lega í það sem hann taldi vera fyrsta lax sum­ars­ins í Blöndu. Fagnaðarlæti þeirra fé­laga voru ein­læg þegar silfraður fisk­ur skellti sér á flug­una. Eft­ir nokkra stund, „þá dró ég þenn­an ódrátt upp úr jök­ul­vatn­inu,“ hló Árni Bald­urs­son. Hann landaði 75 sentí­metra sjó­birt­ingi. Aðeins þyrmdi yfir þá fé­laga og Árni Bald­urs­son ætlaði upp í veiðihús að ná í hluti sem hann hafði gleymt. „Ætlarðu ekki að sjá þegar ég tek fyrsta lax­inn,“ kallaði Reyn­ir til hans. Þetta dugði til að stöðva Árna. Hann sett­ist niður og fylgd­ist með Reyni vaða langt út á Breiðuna. 

Sá fyrsti í sum­ar kom­inn í háfinn. Mik­ill létt­ir og gleði. Ljós­mynd/Á​rni Bald­urs­son

Friggi Posh fékk að fljúga. Þung­ur og svart­ur og grænn skall hann í vatnið. Í þriðja kasti var Reyn­ir kom­inn eins langt út og hann treysti sér. Enn skall Frigg­inn í vatnið. „Hann negldi Frigg­ann með lát­um. Þetta var eng­in kulda­taka,“ upp­lýsti Reyn­ir. Það er verk­efni að slást við stór­lax í vatns­mik­illi Blöndu á Breiðunni. Lax­inn hef­ur allt pláss í heim­in­um en þetta gekk upp eins og svo oft áður hjá þess­um fé­lög­um á þess­um stað.

Árni með ódrátt­inn eins og hann kallaði þenn­an fal­lega sjó­birt­ing í gríni. Þegar þú átt von á að hafa sett í fyrsta lax­inn, þá er allt annað von­brigði. En fal­leg­ur er hann þessi birt­ing­ur. Ljós­mynd/​Reyn­ir Sig­munds­son

92 sentí­metra hrygna er fyrsti lax sum­ars­ins úr Blöndu og mörg­um er létt. Þeir Árni og Reyn­ir höfðu af því áhyggj­ur í gær að mögu­lega myndu þeir í fyrsta skipti núlla í opn­un í Blöndu. Í gegn­um áhyggj­urn­ar mætti líka greina van­trú á að það myndi ger­ast. Enda mættu þeir fersk­ir og bjart­sýn­ir í morg­un og niðurstaðan var held­ur bet­ur ánægju­leg. Reyn­ir hafði séð fisk stökkva á Breiðunni í gær. „Hann var ekki svona stór,“ brosti Reyn­ir og lyfti stór­lax­in­um upp fyr­ir mynda­töku. „Ég varla næ utan um stirtl­una á henni,“ sagði Reyn­ir um leið og hann gaf henni frelsi á nýj­an leik.

Þetta er ekta Blöndu­fisk­ur. Von­andi er þetta ávís­un á betra sum­ar í Blöndu. Ljós­mynd/Á​rni Bald­urs­son

Blanda er kom­in á blað og all­ir gleðjast yfir því. Þeir fé­lag­ar eru farn­ir út í aft­ur að setja í fleiri.

• Blogga um frétt

Sein­ustu hundraðkall­ar sum­ars­ins