Fimm á opnunarvakt og engin rauð flögg

Með hófstillta von í brjósti byrjuðu veiðimenn snemma í morg­un í opn­un Víðidals­ár. Frétt Sporðak­asta um mögu­leg rauð flögg á lofti í laxveiðinni fór illa ofan í menn með eggj­um og bei­koni. Það átti eft­ir að breyt­ast fljótt og ör­ugg­lega. Skemmst er frá því að segja að lax­ar veidd­ust á öll­um svæði ár­inn­ar. Fyrsta lax­inn fékk Rögn­vald­ur Guðmunds­son klukk­an 8:04 í Neðri Ármót­um. Reynd­ist þar á ferð 86 sentí­metra Víðidals­ár­hrygna. Speg­il­björt og fög­ur. Stuttu síðar var sett í landað fiski í Ker­inu í Fitjá. Ann­ar fylgdi svo í kjöl­farið. Á neðsta svæðinu fékkst einn lax í Faxa­bakka og sá fimmti kom á land á svæði tvö í veiðistaðnum Galta­nesi. Sam­tals fimm lax­ar á fyrstu vakt­inni. Eng­in rauð flögg í Víðidal.

Glæsi­leg­ur fisk­ur og veiðisum­arið 2025 er hafið í Víðidal. Ljós­mynd/​Sporðköst

Tvennt kom mönn­um sér­stak­lega á óvart á neðsta svæðinu. Sjó­bleikj­an er mætt í miklu magni. „Það er bara ekki hægt að veiða Dals­árós­inn fyr­ir bleikju,“ sagði veiðimaður í sam­tali við Sporðaköst um leið og hann losaði úr þeirri ní­undu. Allt voru þetta tveggja til þriggja punda bleikj­ur og gull­fal­leg­ar.

Loks urðu menn var­ir við laxa að ganga og kíktu þeir upp úr á brot­un­um og köfuðu þess á milli. Aðstæður eru mjög góðar í Víðidal. Milt veður og drop­ar. Áin hækkaði nokkuð í morg­un og það verða spennt­ir veiðimenn sem fara út eft­ir há­degi.

• Blogga um frétt

Sein­ustu hundraðkall­ar sum­ars­ins