VERIÐ er að kanna hvort lögfræðingur skákmeistarans Bobbys Fischers fær að færa honum íslenskt vegabréf, að því er Sæmundur Pálsson, vinur og stuðningsmaður Fischers, sem staddur er í Tókýó, sagði í samtali í gær.
Guðmundur G. Þórarinsson, Einar S. Einarsson og Garðar Sverrisson, stuðningsmenn Fischers, komu í gær til Tókýó þar sem Sæmundur tók á móti þeim. Þeir fóru yfir stöðu mála. "Það hefur ekkert breyst. Fischer er ennþá í einangrun og við fáum ekki að heimsækja hann. Við ætlum að reyna að fara fram á að það verði leyfð heimsókn til hans," sagði Sæmundur.
Stuðningsmenn Fischers unnu að því í gær að undirbúa blaðamannafund sem haldinn verður á hóteli í Tókýó í dag. "Svo verðum við með blaðamannafund klukkan 13:30 að okkar tíma á morgun," sagði Sæmundur í gær og bætti því við að þar myndu stuðningsmenn Fischers kynna málið og útskýra "á hvaða forsendum við séum komnir alla þessa leið". Sæmundur sagði að John Bosnitch, stuðningsmaður Fischers í Japan, byggist við um þrjátíu til fjörutíu blaðamönnum víðsvegar að á fundinn.
Býst við svari í dag
Sæmundur sagði að stuðningsmenn Fischers hefðu aftur haft samband við Þórð Ægi Óskarsson, sendiherra Íslands í Japan. Hefðu þeir beðið hann að kanna hvort ekki væri hægt að láta lögfræðing Fischers hafa vegabréfið til þess að færa honum. Sæmundur benti á að Fischer væri ekki í fangelsi heldur í innflytjendabúðum og það væri ekkert óeðlilegt við að mönnum sem væru í haldi í slíkum búðum væru afhent vegabréf."Við ætlum að fara fram á að lögfræðingi Fischers verði afhent vegabréfið og að annaðhvort hún eða við saman afhendum það," sagði Sæmundur. Hann sagði að svar ætti að fást hjá sendiherranum klukkan níu í morgun að japönskum tíma. "Þá ætlaði hann að láta okkur vita hvort hann hefði einhverjar frekari fréttir," sagði Sæmundur.