FORVARNARSTARF gegn vímuefnanotkun unglinga hefur skilað verulegum árangri og hafa bæði áfengisdrykkja og hassreykingar dregist verulega saman frá árinu 1997. Þetta er niðurstaða úttektar á forvarnarstarfi Reykjavíkurborgar á árunum 1997-2003 sem kynnt var á ráðstefnu í Ráðhúsinu í gær.
Inga Dóra Sigfúsdóttir, hjá Rannsóknum og greiningu og forseti kennslufræði- og lýðheilsudeildar Háskólans í Reykjavík, minnti á að árið 1997 hefðu rannsóknaraðilar og þeir sem bæru ábyrgð á stefnumótun ákveðið að hefja markvisst forvarnarstarf byggt á traustum rannsóknum til að draga úr neyslu vímuefna. Á þessum tíma hefðu menn staðið frammi fyrir því að vímuefnanotkun hafði aukist allan tíunda áratuginn og var svo komið að íslenskir unglingar voru í hópi þeirra sem neyttu áfengis hvað oftast.
Bæði hefur dregið úr reykingum og áfengisneyslu
Inga Dóra sagði að starfið hefði skilað árangri og benti á að skv. rannsókn hefði drykkja minnkað úr 44% árið 1998 í 26% árið 2004, reykingar dregist saman úr 23% í 12% og hassneysla minnkað úr 21% í 14% á sama tímabili.Hlutfall tíundu bekkinga sem drykkju hefði minnkað úr 21% árið 1997 í 14% árið 2004. Þetta væri talsvert frábrugðið þróuninni erlendis þar sem neyslan hefði ýmist aukist eða staðið í stað.
Inga Dóra sagði að þó að vægi jafningjahópsins ykist með aldri barna væri hlutverk foreldra greinilega mikilvægt. Eftirlit foreldra drægi úr hættu á vímuefnaneyslu.
"Eitt af því sem mikilvægt er að hafa í huga í því sambandi er að magn þess tíma sem foreldrar verja með börnum sínum skiptir miklu máli. Þannig virðist greinilega ekki nóg að hamra á því að eyða gæðatíma með börnum sínum, tímamagnið skiptir ekki síður máli," sagði hún