Himinn og haf mætast

MAGNÚS Þorsteinsson, stjórnarformaður og aðaleigandi Avion Group, tilkynnti í gær að félagið hefði keypt 94,1% hlut Burðaráss hf. í Eimskipafélagi Íslands. Kaupverðið er 21,6 milljarðar króna og eru 12,7 milljarðar greiddir í peningum en 8,9 milljarðar með hlutabréfum í Avion Group. Eftir kaupin býr Avion Group yfir 67 þotum og 22 skipum og rekur 80 starfsstöðvar um allan heim. Stefnt er að skráningu Avion Group í Kauphöll Íslands fyrir 31. janúar á næsta ári, en fyrirtækið yrði eitt af þeim stærstu í Kauphöllinni.

Magnús sagði að með kaupunum á Eimskipafélaginu gæti Avion Group sótt fram á mörgum sviðum og raunar hefðu kaupin gengið undir heitinu "himinn og haf" innan Avion Group, með vísan til starfseminnar, skipa- og flugvélarekstrar. Þar má reyndar einnig bæta við landflutningum, t.d. á vegum Flytjanda, sem er að meirihluta í eigu Eimskips.

Ódýrari olía og tryggingar

Magnús sagði að sumarið yrði nýtt til að ná sem allra mestri samlegð í rekstrinum og gera hann skilvirkari. Í samtali við Morgunblaðið nefndi Magnús m.a. að augljóslega mætti ná töluverðri hagræðingu í eldsneytiskaupum þegar innkaup á öllu því magni sem flugvéla- og skipafloti félagsins notar færast á sömu hendur og eflaust væri einnig hægt að ná mun hagstæðari samningum við tryggingafélög en nú. Sama ætti við um samninga við lánardrottna, en augljóslega myndi smávægileg lækkun vaxta þýða háar upphæðir fyrir svo umfangsmikinn rekstur. Samlegðaráhrif þessi væru aðeins upphafið að hagkvæmari rekstri. "Með kaupunum hefur orðið til stærsta félag landsins í flutningastarfsemi með áætlaða 110 milljarða veltu á þessu ári, 4.400 starfsmenn og 80 starfsstöðvar víða um heim," sagði Magnús.

Aðspurður hvort fyrir lægju einhverjar breytingar á áætlunum félaganna eða tíðni ferða sagði Magnús svo ekki vera. "Avion Group hefur átt ágætt samstarf við Eimskip um flugflutninga til og frá Íslandi. Við munum nýta það að við erum að fljúga og sigla um allan heim og höfum miklu meiri slagkraft núna, með sameinaðar söluskrifstofur og starfsemi mjög víða."

Kaupsamningurinn var gerður með fyrirvara um að Avion Group fjármagni kaupin innan 14 daga. Magnús sagði fjármögnunina vera á góðri leið. "Fjármögnunin verður hefðbundin, við gefum út nýtt hlutafé og skuldabréf og reynum að finna hinn gullna meðalveg þar á milli. Við erum að ræða við nokkra aðila í því sambandi, bæði innlenda og erlenda. Ég er mjög bjartsýnn á að fjármögnunin takist innan tiltekins tíma."

Fjöldi þeirra hluta, sem Burðarás fær í Avion Group við kaupin og metnir eru á 8,9 milljarða króna, verður ekki endanlega ákvarðaður fyrr en við skráningu Avion Group í Kauphöll Íslands. Náist ekki markmið um skráningu fyrir 31. janúar á næsta ári hefur Avion Group skuldbundið sig til að kaupa þessa hluti af Burðarási.

Magnús, Hafþór og Baldur við stjórnvölinn

Magnús verður stjórnarformaður Avion Group sem fyrr. Þá mun Hafþór Hafsteinsson áfram stýra flugrekstri samstæðunnar, þ.e. Air Atlanta, Excel Airways og viðhaldsþjónustunni Avia Technical Services.

Baldur Guðnason, forstjóri Eimskips, stýrir skipafélaginu áfram. Baldur benti á að "óskabarn þjóðarinnar", eins og Eimskipafélagið var nefnt í árdaga, ætti að baki rúmlega 90 ára sögu í flutningum. Hann kvaðst fagna þeim styrk sem sameiningin við Avion Group færði Eimskip. "Undanfarnar vikur hefur verið unnið af kappi að undirbúningi þessa samnings, en núna hefst fyrir alvöru mikil vinna við að gera Avion Group að einum eftirsóttasta kostinum sem býðst í Kauphöllinni."

Hafþór Hafsteinsson kvaðst einnig vænta mikils af nýju samstarfi. Bæði félögin byggju að mikilli reynslu góðs starfsfólks og sameinuð myndu þau skila aukinni arðsemi. Avion Group gæti boðið viðskiptavinum sínum heildarlausnir í flutningum. "Sameinaðir kraftar gefa enn frekari sóknarfæri," sagði hann.

Magnús Þorsteinsson seldi á dögunum hlut sinn í Samson eignarhaldsfélagi ehf. og Samson Holding, sem hann átti í félagi við Björgólf Guðmundsson og Björgólf Thor Björgólfsson. Samson-félögin eiga hluti í Landsbanka Íslands og Burðarási. Við sölu Magnúsar á hlut sínum í Samson kom fram, að með þeirri ákvörðun ætlaði Magnús sér að einbeita sér að fjárfestingum í almennri flutningastarfsemi og flugrekstri.