MÁTTURINN er enn með íslenskum kvikmyndahúsagestum ef marka má mest sóttu kvikmyndina í bíóhúsum landsins þessa vikuna. Stjörnustríðsmyndin Hefnd Sithsins situr sem fastast í toppsætinu þriðju vikuna í röð.
Með helgartekjum myndarinnar er Hefnd Sithsins orðin tekjuhæsta mynd ársins hér á landi auk þess sem hún fór yfir 30 þúsund manna aðsóknarmarkið á sínum 17. degi í sýningu. Það er því óhætt að fullyrða að landsmenn hafi tekið vel á móti nýjasta lauknum í Stjörnustríðsgarði George Lucas.
Önnur mest sótta mynd helgarinnar síðustu er kvikmyndin A Lot Like Love , sem frumsýnd var í vikunni. Myndin, sem fjallar um hina þunnu línu milli ástar og vináttu, skartar þeim Ashton Kutcher og Amanda Peet í aðalhlutverkum.
Gamanmyndin Monsters-in-Law og tryllirinn House of Wax falla báðar niður um eitt sæti í annarri viku sinni á listanum.