MEISTARAR Detroit Pistons sýndu enn einu sinni í lokaleik úrslita Austurdeildar NBA-deildarinnar í körfubolta gegn Miami Heat að aldrei á að afskrifa meistaraliðið í fyrr en það er slegið úr leik. Detroit sótti Miami heim á mánudag og vann í hörkuleik, 88:82, og þar með Austurdeildartitilinn. Detroit mætir San Antonio Spurs í úrslitum NBA-deildarinnar sem hefjast á fimmtudag.
Leikur liðanna var jafn lengst af, en á lokamínútunni kom leikreynsla Pistons í ljós og yfirvegaður leikur var grunnurinn að sigri liðsins. Þetta var í tíunda skipti í röð í úrslitakeppni sem Pistons vinnur leik þegar tap myndi þýða að það yrði slegið út. Miami náði 3:2 forystu eftir sigur í síðustu viku, en meistararnir sýndu þá styrkleika sinn með tveimur sigrum í röð. Rick Hamilton skoraði 22 stig fyrir Detroit, þar sem jafnræði ríkti að mestu í stigaskorun meðal leikmanna. Liðsheild Detroit er styrkur meistaranna og Larry Brown, þjálfari Detroit, er nú með liðið í úrslitunum annað árið í röð, en framtíð hans hjá liðinu er nokkuð óviss. Brown á við heilsuvandamál að stríða og ef hann nær ekki bata í
sumar mun hann sjálfsagt leggja þjálfun á hilluna. "Við unnum þennan leik eins og fyrsta leikinn í einvíginu, með yfirvegun í lokin. Ég sagði við leikmenn mína að svona tækifæri kæmu ekki oft í fangið á þeim og
við yrðum að njóta þess eins vel og við gætum," sagði Brown í leikslok.
Miami má vel við una, þótt erfitt sé að hugsa til þess eftir svo slæmt tap. Shaquille O'Neal skoraði 27 stig fyrir Heat, en Miami tapaði einvíginu fyrst og fremst þegar Dwyane Wade meiddist í fjórða leik liðanna. Samherjar hans kláruðu þann leik, en Wade lék ekki í sjötta leiknum sem var stórtap og í leiknum á mánudag barðist hann hetjulega þótt hann gæti augljóslega ekki beitt sér að fullu. "Allir samherjar mínir hefðu gert það sem ég gerði í kvöld, en því miður klúðruðum við of mörgum tækifærum í lokin og því fór sem fór," sagði Wade vonsvikinn í leikslok.
Til baka
Leita í greinasafni
Prenta grein
