Kristján Belló Gíslason fæddist í Vestmannaeyjum 1. febrúar 1912. Hann lést á hjúkrunarheimilinu Sunnuhlíð 31. maí síðastliðinn og var jarðsunginn frá Kópavogskirkju 7. júní.
Elsku pabbi. Það kemur svo ótal margt upp í hugann þegar ég minnist þín. Þú varst mér alltaf svo góður og gerðir allt til að uppfylla óskir mínar og væntingar. Það er erfitt að lýsa þér í fáeinum orðum en þú varst stoltið mitt, alltaf svo akkúrat. Mikill húmoristi, virðulegur og blíður maður. Ég fann alltaf hvað þér þótti vænt um mig. Mér eru svo minnisstæðar stundirnar í Fljótshlíðinni, þegar við fórum í Deild og Múlakot og gengum upp á Stóra og Litla Dímon til að tína ber.
Vænt þykir mér um stundirnar sem við áttum saman í Sunnuhlíðinni. Þá gátum við gefið okkur nægan tíma til að ræða um lífið og tilveruna. Þú varst alltaf svo glaður að sjá mig og ég mun sakna orðanna: ,,Ertu komin, elsku rósin mín?"
Elsku pabbi minn, nú veit ég að þér líður vel og þú ert kominn til dóttur minnar og bróður. Megi góður Guð geyma þig.
Þín dóttir,
Arnþrúður.
Elsku afi, blessuð sé minning þín.
Þín barnabörn,
Halldóra Kristín,
Eiríkur og Ívar.
Elsku amma, mamma, Gulla, Þröstur, Stebbi og aðrir aðstandendur, við vottum ykkur okkar dýpstu samúð.
Guð veri með ykkur öllum.
Soffía Heiða, Kristín Halla, Haddý Anna og Eva Dögg.