Þýski listamaðurinn Gerhard König, sem undanfarin ár hefur unnið að endurbyggingu listaverka Samúels Jónssonar í Selárdal, er einnig orðinn góðvinur Hvalasafnsins á Húsavík.
Á síðasta ári kom Gerhard í heimsókn og hóf að skera út hvali í stórt kjálkabein sem stendur fyrir utan Hvalasafnið. Hann var aftur á ferðinni í sumar og í síðustu viku lauk hann við listaverkið með því að skera út hvali og kolkrabba á bakhlið kjálkabeinsins.
Ásbjörn Björgvinsson, forstöðumaður safnsins, segir að næsta verk sé að koma beininu fyrir á góðum stað til að ferðamenn geti skoðað listaverkið frá báðum hliðum. Ásbjörn segir listamanninn gefa alla vinnu sína við verkið enda mikill áhugamaður um hvali og hvalaskoðun.
"Við á Hvalasafninu erum Gerhard ákaflega þakklát fyrir framlagið og hlökkum til að sjá hann aftur að ári," sagði Ásbjörn að lokum.
Til baka
Leita í greinasafni
Prenta grein
