Erlend tónlist

Markaðurinn fyrir rokkminjagripi hefur tekið kipp að undanförnu, en ekki er óalgengt að safnarar pungi út sem nemur sex og hálfri milljón íslenskra króna fyrir álitlega rokkgripi á borð við hljóðfæri og fatnað þekktra rokkara. Nýi markhópurinn samanstendur af rokkaðdáendakynslóðinni sem var á unglingsaldri á sjöunda og áttunda áratugnum en hefur nú komist í álnir. Þannig seldust t.d. á dögunum handskrifuð ljóð Bobs Dylans fyrir 78 þúsund bandaríkjadala á árlegu rokk- og poppvöruuppboði Christies-uppboðshaldarans. Blaðsnepill sem John Lennon hraflaði á textann að laginu "All You Need is Love" var sleginn fyrir 1 milljón dala á uppboði í júlí. Þá seldist "Blackie", Fender-rafmagnsgítar sem Eric Clapton notaðist við á árunum 1970 til 1985, fyrir tæpa milljón bandaríkjadala á uppboði í júní síðastliðnum. "Blómabarna-kynslóðin er orðin óhóflega loðin um lófana og lítur á rokkminjagripasöfnun sem vænlega og gefandi fjárfestingarleið," segir safnarinn Ed Kosinski um hinn blómstrandi rokkminjagripamarkað.

Marilyn Manson gekk að eiga unnustu sína Dita Von Teese við látlausa athöfn á Írlandi í síðustu viku, að sögn tímaritsins People . Hinn umdeildi rokkari og kona hans gáfust hvort öðru frammi fyrir sextíu brúðkaupsgestum í borgaralegri athöfn í kastala í eigu vinar en kvikmyndagerðarmaðurinn Alejandro Jodorowsky gaf hjónin saman. Manson er 36 ára að aldri, en Von Teese 33ja. Þau hafa verið par í fjögur ár og trúlofuðust í fyrra.

Netvæðingin hefur endurlífgað markaðinn fyrir tónlistarmyndbönd eftir lægð sem ríkt hefur í þeim efnum frá því um miðjan tíunda árauginn. Þá hóf hin útbreidda tónlistarsjónvarpsstöð MTV að sýna veruleikasjónvarpsþætti í auknum mæli og var dregið verulega úr sýningum tónlistarmyndbanda, þannig að aðeins allra stærstu stjörnurnar komust að með myndbönd sín. Nú hefur tónlistarmyndbandadreifing á netinu gjörbreytt landslaginu, og er hvarvetna hægt að hlaða niður stökum myndböndum þekktra og minna þekktra hljómlistarmanna, m.a. í stykkjatali í gegnum iTunes Music Store, og á MySpace.com tónlistarvefsíðunni sem hefur um 36 milljón notendur. Fyrir vikið hefur myndabandaframleiðsla aukist og hefur MTV-sjónvarpsstöðin hafið dreifingu tónlistarmyndabanda á Overdrive Channel á netinu, áþekkum þeim sem einnig er að finna á Yahoo og AOL. Með auknum tækifærum til að koma tónlistarmyndböndum á framfæri hefur gróska færst í formið á ný, og nýta böndin sér óspart óhefðbundnari dreifileiðir. My Chemical Romance birti t.d. nýja myndbandið að "I'm Not OK" á MySpace.com áður en það var frumsýnt á MTV-sjónvarpsstöðinni. Þá hyggjast Fall Out Boy gefa út tvær ólíkar myndabandsútgáfur titillags næstu smáskífu sinnar, aðra vinsældarvæna fyrir MTV-dreifingu en hina djarfari fyrir óhefðbundna netmiðla. Með hinni nýju þróun eru tónlistarmyndbönd jafnframt orðin að söluvöru í sjálfu sér, ekki aðeins kynningarefni sem fylgir með hljómplötuútgáfu.