Bandarísk blöð hafa nýlega greint frá því að Bush forseti hafi endurreist mannorð þeirra sem ráðnir voru til þess af stjórnvöldum að hlera símtöl bandarískra borgara. Var lögð áhersla á að þeir hefðu unnið þjóðnýt störf. Guðmundur bróðir minn var lærður loftskeytamaður og símritari. Hermann Jónasson dómsmálaráðherra réð hann til þess að ráða dulmál landhelgisbrjóta. Tókst það og hlutu þeir dóma. Síðar réð Hermann Guðmund til þess að koma upp um brennivínssala á bifreiðastöðvum borgarinnar. Var það viðkvæmt mál því símar margra bifreiðastjóra voru hleraðir. Það hafði þó einnig gerst í Hvíta stríðinu svokallaða og voru þá íhaldsmenn að verki.
Morgunblaðið fann upp mjög smellið uppnefni á Guðmund bróður. Það kallaði hann hlustarverk.
Þegar ég las fregnina um Bush og hlustarverki hans hringdi ég til Styrmis ritstjóra og spurði hvort ekki væri tímabært að Morgunblaðið lyfti Guðmundi á stall. Ekki síst þar sem sannast hefir að tveir bæjarfulltrúar Alþýðuflokksins fengu að gjöf frá Jónasi Jónssyni dómsmálaráðherra áfengisútsölu í Hafnarfirði. Það voru þeir Kjartan Ólafsson, faðir Magnúsar Kjartanssonar, og Björn Jóhannesson, faðir Guðmundar prófessors og afi og nafni Björns, þess sem ritað hefur sögu trachoma á Íslandi, en ekki viðurkennt lækningu Marinós bakara í Hafnarfirði og vantar þar vísindaheiður.
Pétur Pétursson þulur.
Til baka
Leita í greinasafni
Prenta grein
