Samherji hf. hefur fest kaup á skipi á Hjaltlandi. Skipið er 71 metri að lengd og 13 metrar á breidd og sérstaklega hannað til uppsjávarveiða. Það hefur 10.000 hestafla vél og burðargeta þess er 2.100 tonn í sjókælitönkum (RSW).
Skipið var smíðað í Noregi árið 1998. Skipið, sem nú ber nafnið Serene LK-297, kemur til Akureyrar í dag, þriðjudag en verður afhent Samherja síðar í vikunni. Það mun hljóta nafnið Margrét EA-710 en skip með því nafni hefur nú verið í eigu félagsins í 20 ár. Ráðgert er að skipið fari í sína fyrstu veiðiferð fyrir Samherja innan skamms.
"Samherji hefur ávallt kappkostað að hafa sem bestan og fullkomnastan búnað í veiðum og vinnslu til að búa sem best að starfsfólki sínu og auka samkeppnishæfni félagsins. Kaupin á Serene eru þannig liður í nauðsynlegri endurnýjun skipastóls fyrirtækisins en reiknað er með að á næsta ári fari eldra skip úr rekstri fyrir hið nýja skip," segir í frétt um skipakaupin frá Samherja.
Til baka
Leita í greinasafni
Prenta grein
