Sævar Þór bjargvættur Fylkismanna

Fylkismenn byrjuðu með látum í gær og Haukur Ingi Guðnason átti fínt skot frá vítateig strax á annarri mínútu. Víkingar mættu greinilega til leiks til að ná í stig og fóru sér að engu óðslega. Sóknir þeirra byggðust á að koma boltanum fram á Daníel Hjaltason sem var einn frammi og vona hið besta. Þessa varkárni náðu Fylkismenn hins vegar illa að nýta sér í fyrri hálfleik. Boltinn gekk að vísu ágætlega manna á milli en fátt markvert gerðist enda voru sendingar þvert á völlinn eða til baka trúlega fleiri en sendingar þeirra fram á völlinn.

Víkingar bættu í er líða fór á hálfleikinn og fengu fín færi en Daníel misnotaði tvö slík eftir undirbúning Arnars Jóns Sigurgeirssonar og Ragnar Sigurðsson skallaði framhjá úr fínu færi auk þess sem Viktor Bjarki Arnarson átti fínt skot úr aukaspyrnu rétt framhjá, Guðni Rúnar Helgason hitti markið hinum megin úr aukaspyrnu en Ingvar Þór Kale sló boltann frá.

Arnar Jón átti flott skot um miðjan síðari hálfleik en boltinn fór í varnarmann og þaðan í þverslána. Víkingar töldu reyndar að boltinn hefði farið í hönd varnarmannsins en Ólafur Ragnarsson, ágætur dómari leiksins, sá ekkert athugavert.

Haukur Ingi Guðnason fór útaf fyrir Sævar Þór á 65. mínútu og rúmri mínútu síðar skoraði Sævar Þór. Markið var í rauninni sanngjarnt því Fylkismenn voru mun sprækari en Víkingar í síðari hálfleiknum, en eins og svo oft áður bökkuðu leikmenn Fylkis eftir markið og Víkingar tóku til við að sækja af þunga. Það bar ekki tilætlaðan árangur hjá þeim frekar en í fyrri hálfleik. Varnarmenn Fylkis björguðu á marklínu eftir hornspyrnu og síðan varði Fjalar Þorgeirsson meistaralega eftir að Grétar Sigfinnur Sigurðarson skallaði að marki.

Það hefur vantað einhvern neista í Fylkisliðið í nokkrum leikjum í sumar og það sama má segja um leikinn í gær. Hjá Fylki var Fjalar öruggur í markinu og varði það sem þurfti að verja. Guðni Rúnar var kletturinn í vörn liðsins, mjög öruggur og á oft góðar langar sendingar út á kantana, sendingar sem ættu að geta skapað meiri usla en raunin varð í gær. Á miðjunni var fyrirliðinn Ólafur Ingi Stígsson traustur og yfirvegaður og Eyjólfur Héðinsson var duglegur. Haukur Ingi var sprækur í fyrri hálfleik og aðrir áttu fína spretti. Albert Brynjar Ingason átti erfitt uppdráttar í fyrri hálfleik en bætti sig verulega í þeim síðari.

Hjá Víkingum var fyrirliðinn Höskuldur Eiríksson gríðarlega traustur sem hægri bakvörður og við hlið hans var Grétar Sigfinnur einnig öruggur. Besti maður liðsins var þó Arnar Jón Sigurgeirsson sem átti fínan leik á miðjunni, var bæði duglegur og hugmyndaríkur. Sendingar hans sköpuðu oft hættu. Viktor Bjarki átti fína spretti, sérstaklega í fyrri hálfleik og það sama má segja um Daníel, sem gerði vel einn á móti margnum innan um varnarmenn Fylkis. Þá átti Stefán Kári Sveinbjörnsson ágæta spretti og stóð sig vel, sérstaklega í síðari hálfleiknum.