MÍLA er nafn nýs fyrirtækis sem stofnað hefur verið um rekstur, uppbyggingu og viðhald fjarskiptanets Símans. Míla hefur formlega rekstur hinn 1. apríl næstkomandi en stofnun fyrirtækisins var samþykkt á aðalfundi Símans í síðustu viku. Þá runnu tilteknir eignarhlutar í Símanum og dótturfélögum inn í sérstakt hlutafélag, Skipti hf., sem verður móðurfélag samstæðunnar.
Í tilkynningu segir að Míla taki við þeirri starfsemi sem áður tilheyrði heildsölu Símans, viðhaldi og rekstri á fjarskiptanetinu og áframhaldandi þróun og uppbyggingu á því.
"Fjarskiptanet Mílu byggist á stofnneti, sem er eins konar burðarlag fyrir öll fjarskiptakerfin og aðgangsneti sem tengir viðskiptavini Mílu inn á fjarskiptakerfin. Aðgangsnetið byggir að grunni til á koparlínum, ljósleiðurum og kóaxstrengjum," segir í tilkynningunni. Þá kemur fram að nærri öll fyrirtæki og heimili landsins séu tengd koparlínukerfi Mílu. Einnig segir að á fjarskiptaneti Mílu séu öll sambönd fyrir almenna símaumferð, innanlands og til útlanda, sambönd fyrir GSM- og NMT-farsímakerfi viðskiptavina símafyrirtækjanna og gagnasambönd. Ennfremur reki Míla flutningskerfi að sendum nær allra útvarps- og sjónvarpsstöðva í landinu.
Starfsmenn Mílu eru 220 og framkvæmdastjóri þess er Páll Á. Jónsson.