Eftir Bergþóru Jónsdóttur
begga@mbl.is
"ÞAÐ er miklu meira fjör í þessari þjóðlagatónlist en þeirri íslensku. Eftir að vikivakarnir voru bannaðir var ekkert eftir nema hægu og þungu lögin – eintómur vangadans en þarna austur frá er mikið sprell, sungið í sjö áttundu og alls konar takttegundum," segir Helgi Bragason, stjórnandi Kammerkórs Hafnarfjarðar. Kórinn heldur tónleika í Hafnarborg í kvöld og annað kvöld klukkan 20 ásamt Balzamer-sveitinni Bardukha. Á efnisskránni verða þjóðlög frá Austur-Evrópu.
Helgi segir tónlistina á tónleikunum einkennast af fjöri, hraða og takttegundum sem Íslendingar séu ekki vanir. "Íslendingar eiga erfitt með að syngja annað en tvískiptan takt – ef það er ekki þúfnagangurinn, þá er það erfitt. Svo er þetta arfahratt," segir Helgi og hlær.
Kammerkór Hafnarfjarðar og Bardukha hafa áður flutt íslensk þjóðlög á tónleikum bland við austur-evrópska dansa. "Nú langaði okkur að vera eingöngu með austur-evrópska tónlist. Við erum með lög frá Tékklandi, Mæri, Slóvakíu, Búlgaríu, Króatíu og Serbíu á margvíslegum tungumálum. Þessi tónlist er svolítið sígaunaleg og við syngjum á sex eða sjö tungumálum sem við skiljum ekkert í," segir Helgi og bætir því við að það hafi verið heilmikil vinna að fara í gegnum textana.
Balzamer-tónlistin, sem er Bardukha-leikur, á einmitt rætur sínar að rekja til austur-evrópskrar, arabískrar og persneskrar þjóðlagahefðar auk sígaunatónlistar. Í sveitinni eru Hjörleifur Valsson fliðluleikari, Ástvaldur Traustason harmonikkuleikari, Birgir Bragason kontrabassaleikari og arabíski handtrommuleikarinn S.G. – öðru nafni Steingrímur Guðmundsson.