Það hefur gengið á ýmsu hjá skíðasvæðunum að undanförnu vegna snjóleysis. Engu að síður fengu þau auglýsingaverðlaunin, lúðurinn, á dögunum fyrir að keyra snjó í bæinn og setja skilti í hrúguna: "Bláfjöll 30 km". Af því tilefni orti "Bláfjallaskáldið" Grétar Hallur Þórisson, forstöðumaður Skíðasvæðanna:
Ég næstum því af göflum gekk
við grimmdarmeðferð slíka.
Á lúðurinn í fyrstu fékk
en fékk svo gripinn líka.
Hann bætti við:
Fjalla tryllti trúðurinn
í tómu skulda bauki.
Loksins fékk á lúðurinn
og Lúðurinn að auki.
Við ríkjandi aðstæður kveðst forstöðumaðurinn þurfa að bera allflestar ákvarðanir undir rekstrarstjórn og af þeim sökum hafi hann upplifað að hann ráði ansi fáu núorðið. Starfsheitið Fáráður leiti því á hugann.
Starfs míns blaktir bláþráður
berst þó áfram sárþjáður.
Grétar Fjallafáráður
festir við sig smágráður.
Bjartsýnin er hins vegar meiri hjá öðrum, eins og kemur fram í vísu Rúnars Kristjánssonar á Skagaströnd um nýfallinn dóm:
Engin merki um auraskort
eru í kringum Bubba.
Hamingjan er krítarkort
krýnir fleiri en lubba.
pebl@mbl.is
Til baka
Leita í greinasafni
Prenta grein
