KONUR úr Lionsklúbbnum Engey í Reykjavík hafa afhent Krabbameinsfélaginu 1,2 milljónir króna til kaupa á brjóstaómsjá til notkunar við leit að brjóstakrabbameini í Leitarstöð Krabbameinsfélagsins við Skógarhlíð í Reykjavík.
Konurnar söfnuðu þessu fé með tónleikum í Salnum í Kópavogi í marsmánuði undir yfirskriftinni "Gleðistund í góðum tilgangi". Allir listamennirnir gáfu vinnu sína. Lionsklúbburinn Engey hefur áður styrkt Krabbameinsfélagið, meðal annars við sölu á pennum og merkjum.
Nú er verið að undirbúa það að farið verði að taka stafrænar röntgenmyndir við leit að brjóstakrabbameini á vegum Krabbameinsfélagsins. Í því sambandi er mikilvægt að fá nýja brjóstaómsjá og kemur þessi stuðningur því að góðum notum. Krabbameinsfélagið kann konum í Lionsklúbbnum Engey og öllum sem studdu þær miklar þakkir fyrir framtak þeirra og liðveislu við að bæta greiningu brjóstakrabbameins, segir í fréttatilkynningu.