Í DAG fer fram síðasta Föstudagsfiðrildið á vegum Skapandi sumarhópa Hins hússins. Það sem af er sumrinu hafa hóparnir skemmt gestum og gangandi um borgina við mjög góðar undirtektir og í dag er hægt að sjá hópana á eftirfarandi stöðum:
Lækjartorg Xavier & McDaniel kíkja á Lækjartorg og sýna listir sínar frá 12-14.
Útitaflið v/Lækjargötu Hljóðmyndaklúbburinn Slefberi opnar ljósmyndasýningu og heldur tónleika kl. 12 og 13. Þema vikunnar er súrrealismi.
Kjarvalsstaðir Para-Dís spilar franska klassíska tónlist kl. 12.15.
Ingólfstorg Samyrkjar og Tepoki stilla saman strengi sína á Ingólfstorgi fyrir konung og fósturjörð. Sýnd verða brot úr sýningu sem hóparnir tveir hafa unnið saman og frumsýnd verður í Tjarnarbíói í lok júlí.
Á horni Pósthússtrætis og Austurstrætis Vinir Láru spila lög við texta Þórbergs Þórðarsonar. Gestasöngvari í þetta sinn er ljósmyndarinn Salomon.
Á ferð og flugi Götuleikhúsið myndar faðmlagaflóð á Laugaveginum . Ástin blómstrar í miðbænum.
Laugatorg – Laugavegur – Miðbær Hnoð fer á flakk með "Sveigjanlega herramenn".
Hljómalind – Laugavegur – Austurvöllur Götulíf framreiðir léttleika og ljúfa tóna með tónlistarhópnum Sveiflunni.
Kvosin (Lækjartorg – Lækjargata – Ingólfstorg) O.B. leikhópur sýnir verkið "Samúð: Hvar liggur þín samúð?" Hönnunarhópurinn Títa sýnir ólukkulega tísku á ólukkulegum degi. Ræbbblarnir verða með nýjustu hjólin til sýnis og dreifa fyrsta smáritinu sínu.
Skólavörðuholtið Rafhans 021 úðar rafrænni tónlist yfir Skólavörðustíg.
Á horni Skólavörðustígs og Laugavegs Formklukka verður með vídeóklefa til sýnis.