GESTIR í spurningaleiknum Orð skulu standa í dag eru Guðmundur Þórhallsson kennslustjóri og Hreinn Sigmarsson flotastjóri. Á milli þess sem þeir velta fyrir sér m.a. orðunum „saurljótur“ og „hispurslaus“ botna þeir fyrripart um ný vinnubrögð á Alþingi:
Upphefst núna aftur mas,
þó öllu styttra en forðum.
Um nýliðna helgi var fyrriparturinn þessi:
Búin gleði og gaman er,
gráminn tekur völdin.
Í þættinum botnaði Hlín Agnarsdóttir:
Vænt er þegar vora fer
vini að gleðja á kvöldin.
Sigrún Valbergsdóttir var í miklu stuði:
Við aringlæður orna mér
allra næstu kvöldin.
Maginn eftir situr sver,
syrgir veisluhöldin.
Hagkerfið nú hitar mér,
hækka komugjöldin.
Nályktina leggur hér
leikhúss bak við tjöldin.
Davíð Þór Jónsson:
Þá er gott að gamna sér
með góðri frú á kvöldin.
Úr hópi hlustenda sendi Þorvaldur Óskarsson þennan:
Til Kanarí nú kem ég mér
og konan sér um gjöldin.
Jón Helgason á Hellu:
Viskístaup því væri hér
velkomið á kvöldin.
Sigurður Einarsson í Reykjavík:
En bráðum líka bæta fer
í birtuna á kvöldin.
Magnús Halldórsson á Hvolsvelli:
Spikfeit þjóð í sporthús fer
og spásserar á kvöldin.
Sigurlín Hermannsdóttir:
Drjúgt var keypt í desember;
nú dembast yfir gjöldin.
Guðlaug Freyja Löve:
Björninn útbýr heilan her
sem hefur tögl og höldin.
Hallberg Hallmundsson:
Þá er ljúft að leika sér
við ljóðastef á kvöldin.
Auðunn Bragi Sveinsson orti m.a.:
Þar til aftur elda fer
og eyðast skuggatjöldin.
Ingólfur Ármannsson:
Þá í bólið feginn fer
með frúnni snemma á kvöldin.
Daníel Viðarsson:
Seint á fætur sólin fer
og syfjuð er á kvöldin.
Jónas Frímannsson hugsaði til friðarsúlunnar:
Lampi Jóku lýsir mér
lengur ekki á kvöldin.