AÐALSKOÐUN hf. hefur tekið í notkun fullkomna skoðunarstöð fyrir ökutæki. Nýja stöðin, sem jafnframt er sú sjötta sem félagið hefur yfir að ráða á landinu, er staðsett í Skeifunni 5 í Reykjavík.
Í fréttatilkynningu kemur fram að í nýju stöðinni verði tvær afkastamiklar skoðunarbrautir fyrir fólks- og sendibíla auk brautar fyrir sértækar skoðanir. Brautirnar ráða við allt frá litlum fólksbílum upp í millistærðir bíla og jeppa.
Öll hönnun stöðvarinnar miðar að því að skoðunin gangi greiðlega fyrir sig og aðstaða viðskiptavina sé sem best. Ekið er í gegnum húsnæðið til að auðvelda aðkomu og flæði bíla í gegnum stöðina.