HAFNARBORG á 25 ára afmæli á árinu og efnir í því tilefni til afmælissýningar á verkum úr safneign sinni en Hafnarborg hýsir einnig listaverkaeign Hafnarfjarðarbæjar. Hér kennir margra grasa. Grafíkverk eru áberandi á neðri hæð þegar inn er komið og kallast svart–hvít verk eftir Hörð Ágústsson skemmtilega á við verk eftir Peter Ruppel við dyrnar. Frásagnarkenndar og fígúratívar myndir Elíasar B. Halldórssonar minna á sérstöðu Elíasar innan íslenskrar myndlistar. Stórar sérsniðnar myndir Tryggva Ólafssonar eru kraftmiklar og lífga upp á rýmið. Málverk eftir Þórarin B. Þorláksson, Saurbær á Rauðasandi, er rómantískt og ljúft en ýmsar myndir sem sýna Hafnarfjarðarbæ, málverk og grafík, heldur misjafnar, þó er í þeim sú nostalgíska birta sem einkennir sýn fyrstu landslagsmálaranna á landið.
Á efri hæð er fjölbreytt úrval málverka. Litríkt flæði mynda Bjarna Sigurbjörnssonar mætir manni á stigavegg, Eiríkur Smith er vel kynntur hér með flennistórum og kraftmiklum abstraksjónum á endavegg, tvær myndir eftir Jóhann Briem njóta sín ekki alveg eins vel en miðla þó hans einstöku sýn. Jón Óskar nýtur sín vel í stóru verki sem byggist á endurtekningu mynsturforma og kallast á við áleitið málverk eftir Tróndur Patursson. Yngri málarar á borð við Jónas Viðar og Kristleif Pétursson eru hér einnig.
Úrval úr stóru listaverkasafni, en hér er aðeins fátt eitt upp talið, getur í sjálfu sér aldrei orðið annað en hrærigrautur, sýnishorn strauma og stefna. Leitast er við að tengja heildina innbyrðis með því að mála suma veggina í dökkum litum og fer það ágætlega. Sýningin ber áherslum Hafnarborgar nokkurt vitni; grafíkverk í úrvali, sterk málverk og tengsl við Færeyjar en hér hafa færeyskir málarar verið vel kynntir í gegnum tíðina. Hafnarborg hefur oftlega sýnt framsækin verk og unnin í margs konar miðla en hér er megináherslan á grafík og málverk. Hafnarfjörður sem endurtekið mótíf ljær síðan sýningunni dálítið sjarmerandi andblæ.
Ragna Sigurðardóttir