Grundarfjörður

Síldarskipin hafa nú flest hver yfirgefið veiðisvæðið á Grundarfirði en þar voru þó í vikunni fimm skip, tvö vinnsluskip og þrjú skip sem sigla með aflann til vinnslu í aðra landsfjórðunga þegar þau hafa fyllt sig. Frystitogarinn stóri Vilhelm Þorsteinsson hefur nú í nokkur skipti losað sig við fryst síldarflök í Frystihótelið í Grundarfirði sem tekið var í notkun í nóvember sl. þannig að síld kemur líka á land í Grundarfirði. Tvö risaflutningaskip hafa þegar þessar línur eru ritaðar lagst við Norðurgarðinn hér, til þess að flytja þessa gesti frystihótelsins til Póllands og Rússlands. Það má því með sanni segja að hótelið hafi komið til á réttum tíma. Hvort silfur hafsins sé komið til þess að vera eitthvað um sinn á þessum verustað í Breiðafirði er ómögulegt að segja en líklegra er það þó segja sjálfskipaðir fræðingar.

Snjórinn þykir oft fallegur einkum á jólum og ef það er temmilegt af honum. Eftir allar rigningarnar og stórviðrin á haustmánuðunum er sá hvíti farinn að sýna sig og leggst nú yfir af töluverðum móð. Vélsleðamenn kætast en smábílaeigendur bölva. Skíðaáhugmenn í Grundarfirði áttu ekki von á því að neitt myndi snjóa meir vegna hlýnandi veðurlags svo þeim fannst ekki taka því að reisa við miðjumastrið á skíðalyftunni sem fauk um koll í Þorláksmessuveðrinu 2006. Ef hann heldur áfram að snjóa líkt og að undanförnu, þá týnist mastrið væntanlega í snjónum eins og gerðist áður en skíðalyftan var sett upp í fyrsta sinn 1984. Fyrir jólin 1983 ætluðu miklir eldhugar og skíðaáhugamenn að nota jólafríið sitt til að setja upp skíðalyftu í góða brekku við bæjarmörkin, en um jólin tók að snjóa svo ríflega að möstrin týndust í snjónum og fundust ekki fyrr enn langt var liðið á vetur. Lyftan komst þó upp og þótti hið mesta þarfaþing. Var hún mikið notuð næstu vetur en síðan fór smám saman að fækka þeim dögum sem nægur snjór var í brekkunum. Það þótti hins vegar einn besti kosturinn við þessa skíðalyftu hversu nærri byggð hún var og að geta endað góðan skíðadag með því að renna sér heim til sín.

Söguleg skóflustunga að reiðhöll var tekin sl. föstudag af bæjarstjóranum í Grundarfirði, Guðmundi Inga Gunnlaugssyni. Á sínum tíma úthlutaði landbúnaðarráðherra fjárupphæðum til hestamannfélaga á landsbyggðinni til þess að stuðla að bættri aðstöðu til reiðmennsku og félagsstarfs. Hestamannfélagið Snæfellingur fékk í sinn hlut 15 milljónir og eftir allmiklar sviptingar meðal félagsmanna varð úr að byggð yrði ein stór reiðskemma í Grundarfirði fyrir alla Snæfellinga. Grundarfjarðarbær leggur 16,7 milljónir á móti en auk þess kemur hlutafé frá Hesteigendafélagi Grundarfjarðar og fleiri aðilum. Stjórn Snæfellingshallarinnar ehf. hefur ákveðið að húsið verði að lágmarki 25 x 50 metra stórt en síðan mun það ráðast af því fjármagni sem tekst að fá til verksins hversu vegleg endanleg bygging verður. Jafnframt því að þjóna hestamönnum á félagssvæði Snæfellings er hús þetta hugsað sem fjölnota mannvirki sem nýtast mun á sem fjölbreytilegastan máta á sviði íþrótta og annarra viðburða.