Seyðisfjörður | Nýi skíðaskálinn í Stafdal ofan Seyðisfjarðar vekur mikla ánægju skíðaiðkenda og markar í raun tímamót í uppbyggingu skíðasvæðisins fyrir Seyðfirðinga og Héraðsbúa, sem nýta svæðið sameiginlega.
Alcoa Fjarðaál gaf skíðasvæðinu upplýsingamiðstöð sem staðið hafði ofan álverslóðarinnar á Hrauni í Reyðarfirði meðan á byggingu verksmiðjunnar stóð. Var skálinn fluttur í Stafdal milli jóla og nýárs.
Ólafur Sigurðsson, bæjarstjóri á Seyðisfirði, skrifar um málefni skíðasvæðisins á vef Seyðisfjarðarkaupstaðar. Hann segir þar að ýmsar framkvæmdir hafi þurft vegna skálans og búið sé einnig að vinna mikla jarðvegsvinnu í fjallinu. Þurfi nú miklu minni snjó til að hægt sé að halda svæðinu opnu. Nýr snjótroðari er jafnframt kominn á svæðið.
Fram kemur hjá Ólafi að hugsanlega verði svæðið austan vegarins upp að skíðasvæðinu notað fyrir mótorkross-ökumenn á sumrin og vélsleðasportið þegar kominn er snjór. Verið sé að kanna þessa möguleika og jafnvel megi útfæra aðstöðuna þannig að hún verði sameiginlegt mótorkross- og vélsleðasvæði fyrir allt Austurland, en iðkendur hafi verið á hrakhólum um aðstöðu víða um fjórðunginn.
Til baka
Leita í greinasafni
Prenta grein
