„MENN náðu aldrei þeim grunni sem þarf í leik við Spánverja sem er fyrst og fremst almennilegur varnarleikur. Mér fannst sem menn væru fyrst og fremst að skila af sér skylduleik í mótslok,“ sagði Einar Þorvarðarson, framkvæmdastjóri HSÍ, þegar íslenska landsliðið hafði leikið sinn síðasta leik á Evrópumeistaramótinu í handknattleik í gær.
„Við höfum verið að þvælast með sömu vandamálin með okkur alla keppnina og þau voru enn fyrir hendi í dag. Þá á ég við misjafna leiki innan sama leiksins og þá staðreynd að alltof margir leikmenn hafa ekki sjálfstraust né eru í nógu góðri æfingu um þessar mundir. “
Einar viðurkennir að endalok mótsins hafi verið leiðinleg, en því miður þurfti það ekki að koma á óvart að tapa leik fyrir Spánverjum. „Við höfum átt í vandræðum með þá í gegnum tíðina. Auðvitað vildi ég sjá beittari spilamennsku að þessu sinni, ekki síst til þess að ljúka keppninni á betri hátt en raun ber vitni um.“
Einar sagði það hafa lengi verið sína skoðun að stefnt hafi verið of hátt á Evrópumeistaramótinu, þ.e. að setja stefnuna á verðlaunasæti, enda hafi það komið í ljós að miðað við núverandi ástand hópsins hafi það verið of háleitt markmið. „Héðan af er ekkert annað hægt að gera en að draga lærdóm af þessu,“ sagði Einar Þorvarðarson.
Til baka
Leita í greinasafni
Prenta grein
