Háreysti truflaði stjórnarskiptin

Í dag ætti að kjósa í Reykjavík. Ekki hér í borgarstjórn heldur í borginni allri. Það ætti að kjósa í Reykjavík vegna þess að borgarbúum er misboðið,“ sagði Dagur B. Eggertsson, fráfarandi borgarstjóri, á fundi borgarstjórnar í gær. Dagur og Svandís Svavarsdóttir kváðu sér hljóðs að loknu kjöri forseta og tveggja varaforseta borgarstjórnar, en Hanna Birna Kristjánsdóttir var kjörin forseti, Dagur sjálfur fyrsti varaforseti og Gísli Marteinn Baldursson annar varaforseti.

„Ástæðan er sú að undanfarna daga hefur verið misfarið með lýðræði, umboð og vald,“ sagði Dagur og bætti því við að smám saman hefði komið í ljós að hinn nýi meirihluti sé byggður á blekkingum, upplýsingaskorti, fljótfærnislegum vinnubrögðum og „veruleika sem við höfum aldrei áður kynnst í íslenski pólitík. Flest bendir til þess að meirihluti sem er byggður á þessum grunni, og í raun gerður af tveimur einstaklingum, sé andvana fæddur.“ Hann sagði þetta einn alversta tíma til þess að gera sér stjórnmálin að leik og vísaði í tvísýnar horfur í efnahagsmálum, erfiðar kjarasamningaviðræður og óróa á fjármálamörkuðum.

„Það sem við höfum orðið vitni að undanfarna daga er skrípaleikur. Það er gróf afbökun á því umboði sem það fólk sem hér mun greiða atkvæði sótti til sinna kjósenda. Því hvað hefur gerst? Sjálfstæðisflokkurinn lagðist á hnén og setti hugsjónir sínar á útsölu. Hann notaði sjálfan borgarstjórastólinn sem tálbeitu. Mikið óskapleg er reisn þessa gamla flokks orðin,“ sagði Dagur og fullvissaði í lokin fundarmenn, og sjálfan sig, um að fulltrúar fráfarandi meirihluta væru rétt að byrja. „Við eigum öll enn eftir að vinna okkar bestu verk í þessum sal og þessari borg.“

Soralegt og sorglegt

Því næst tók Svandís Svavarsdóttir til máls og rakti atburðarás REI-málsins í haust. „Við björguðum Orkuveitu Reykjavíkur. Það er umtalsverður árangur, þó ekki annað komi til,“ sagði hún og kvaðst ánægð með áhrif fulltrúa VG innan fráfarandi meirihluta, einna helst á málefni eldri byggðar, mannréttindamál, kjara- og starfsmannamál og hverfalýðræði.

Svandís útskýrði samstarf án málefnasamnings og sagði það ganga upp þegar samstarfsfólkið þekkti hvert annað og áherslur hvers annars. Þar að auki hafi fulltrúar „Tjarnarkvartettsins“ svonefnda farið sameiginlega yfir málefnaáherslur sínar og haldið sameiginlega fundi í sameinuðum borgarstjórnarflokki meirihlutans. Málefnasamningur hafi því ekki verið nauðsynlegur. Svandís gaf Degi heldur ekkert eftir í orðavali. „Leynimakkið. Leyndin. Hraðinn. Samráðsleysið. Umboðsleysið. Allt kunnugleg stef frá því á mánudaginn var. Endurtekið efni, sami höfundur – borgarfulltrúi Vilhjálmur Þ. Vilhjálmsson,“ sagði hún og lýsti málefnaskrá nýs meirihluta sem fátæklegu og veikburða skjali sem gengi út á að fresta framtíðinni. „Þau soralegu, sorglegu vinnubrögð sem eru fæðingarvottorð nýja meirihlutans kunna ekki góðri lukku að stýra. Við erum reiðubúin. Við erum ekki að fara neitt. 75% borgarbúa vilja þetta ekki. Okkur var misboðið í haust, okkur er misboðið núna. Almenningur hefur ekki sagt sitt síðasta orð.“

Að loknum þessum ræðuhöldum var tekin fyrir tillaga um ráðningu borgarstjóra. Þegar kjörið fór fram urðu svo kröftug mótmæli að forseti gerði hlé á fundi. Stóð hléið í tæplega eina og hálfa klukkustund, en þá hafði hægst um.

Skattalækkun strax

Þegar fundur hófst á ný var Ólafur F. Magnússon lýstur réttkjörinn borgarstjóri Reykjavíkur og tók til máls. Þakkaði hann stuðninginn og fullvissaði Reykvíkinga um að hann hygðist sinna störfum sínum af alúð og heilindum. Beið hann þá ekki boðanna, en kynnti 5% lækkun fasteignaskatta á íbúðarhúsnæði, sem færa mun hlutfallið niður í 0,214%. Með lækkuninni minnka álögur á borgarbúa um 135 milljónir króna. Einnig tilkynnti hann að borgarráð tæki síðar um daginn fyrir tillögu um verndun 19. aldar götumyndar við Laugaveg með því að borgin kaupi og láti gera upp húsin við Laugaveg 4 og 6.

Síðar á fundinum þegar tillagan um skattalækkun var tekin fyrir urðu nokkur orðaskipti milli Dags B. Eggertssonar og Vilhjálms Þ. Vilhjálmssonar. Taldi Dagur tillöguna bera vott um sýndarmennsku og tilgerð, en Vilhjálmur svaraði því til að Dagur vildi hreinlega aldrei lækka skatta.

Með þessari byrjun vildi Ólafur undirstrika að hinn nýi meirihluti væri myndaður um málefni. Því næst beindi hann orðum sínum til minnihlutans. „Mikið hefur gengið á og stór orð verið látin falla. Slíkur tilfinningahiti er mannlegur, en ég lít ekki svo á að neitt af því sem gerst hefur undanfarna daga eigi að spilla fyrir góðri samvinnu allra flokka. Ég lít á það sem frumskyldu stjórnmálamanna að þeir vinni eftir sannfæringu sinni og að framgangi þeirra stefnumála sem þeim er treyst fyrir af kjósendum. Ljóst var að innan fráfarandi meirihluta hafði stefnumálum F-listans orðið lítt ágengt. Því er það ákaflega mikilvægt að meirihlutinn hafi komið sér saman um skýran málefnasamning strax í upphafi. Við munum láta málefnin ráða og óskum eftir góðu samstarfi við minnihlutann um það.

Mér þykir afar vænt um borgina og sem borgarstjóri vil ég vinna í þágu allra borgarbúa að því að gera borgina okkar að enn betri borg.“

Öfundsverð pólitísk eftirmæli

Næsti liður á dagskrá var afsögn Björns Inga Hrafnssonar, borgarfulltrúa Framsóknarflokksins. Óskaði hann formlega eftir lausn frá störfum og þakkaði fyrir gott samstarf. Tillaga hans um að minnisvarði um skákmeistarann Bobby Fischer verði reistur við Laugardalshöll var svo afgreidd á borgarráðsfundi síðar í gær, og henni vísað til meðferðar hjá þremur ráðum borgarinnar.

Því næst kvaddi hver borgarfulltrúinn sér hljóðs á eftir öðrum, úr öllum flokkum. „Hann var félagi okkar og vinur,“ sagði Hanna Birna, „duglegur og fylginn sér, kraftmikill með vilja og orku til að gera vel.“ Dagur sagði að með fáum væri jafngaman að vinna. Vilhjálmur Þ. sagði hann útsjónarsaman málafylgjumann, og vonaðist til áframhaldandi vináttu, en Svandís Svavarsdóttir sagði það tregafulla tilfinningu að kveðja slíkan kappa sem Björn Ingi væri. Hann byggi yfir þrótti og léttri lund, hugsaði óvenjulangt fram í tímann og væri sannkallað „pólitískt animal“ með óbilandi stjórnmálaáhuga.

Síðar var tekin fyrir tillaga minnihlutans um fyrirheit um úthlutun lóða fyrir stúdentaíbúðir og þjónustuíbúðir eldri borgara á næstu árum. Tók borgarstjóri tillögunni vel, enda vinnan við hana búin að standa síðan í tíð fyrsta meirihluta kjörtímabilsins.

Kjartan formaður stjórnar OR

Kosið í ráð og nefndir á vegum borgarstjórnar