Þörfinni fyrir hlýja, litríka tóna svalað

TRÍÓ Artis heldur árlega nýárstónleika í Mosfellskirkju kl. 17-18 á sunnudaginn. Aðgangur er ókeypis. Líkt og undanfarin ár leikur tríóið, skipað Kristjönu Helgadóttur flautuleikara, Gunnhildi Einarsdóttur hörpuleikara og Þórarni Má Baldurssyni víóluleikara, tríósónötu Claudes Debussys. Sónatan, sem er fyrsta verkið samið fyrir þessa hljóðfæraskipan, þykir jafn margslungin og hún þykir falleg. Tríói Artis finnst því nauðsynlegt að flytja hana minnst einu sinni á ári og helst í janúar þegar þörfin fyrir hlýja og litríka tóna er mest. Tríóið leikur einnig verk eftir Bach og fleiri.