„MIÐSTJÓRN Alþýðusambands Íslands mótmælir því harðlega að ekki skuli farið að leikreglum við framkvæmd hópuppsagna 59 starfsmanna HB Granda hf. á Akranesi en athygli ASÍ hefur verið vakin á því, að mjög alvarlega hafi verið brotið gegn málsmeðferðarreglum laga um hópuppsagnir nr. 63/2000,“ segir í ályktun frá miðstjórninni, sem samþykkt var á fundi hennar á miðvikudaginn.
„Samkvæmt þeim upplýsingum sem ASÍ hefur aflað sér hefur fyrirtækið ekki viðhaft lögbundið samráð eða látið trúnaðarmönnum starfsmanna í té skriflegar upplýsingar um fyrirhugaðar uppsagnir. Meðan svo er er óheimilt að tilkynna starfsmönnum um uppsagnir á ráðningarsamningum.
Miðstjórn ASÍ leggur áherslu á að lögbundinn réttur starfsmanna til upplýsinga og samráðs í tengslum við hópuppsagnir telst til mikilvægra réttinda launafólks og ASÍ lítur það alvarlegum augum þegar þau eru ekki virt. Miðstjórnin telur mikilvægt að samstaða náist í atvinnulífinu nú þegar mæta þarf erfiðleikum vegna niðurskurðar á aflaheimildum og þegar þeim erfiðleikum sé mætt verði í hvívetna farið að þeim samningum og lögum sem í gildi eru,“ segir í ályktuninni frá miðstjórn ASÍ.
Til baka
Leita í greinasafni
Prenta grein
