Hinir ýmsu páfar hafa í gegnum tíðina setið í glæsilegum bifreiðum og veifað þaðan til fjöldans á ferðum sínum um heiminn. Til þessa brúks hafa verið notaðir sérsmíðaðir bílar, iðulega frá Mercedes Benz, sem hafa jafnan verið hvítir á lit, opnir og jafnvel skotheldir. Páfinn hefur t.d. látið sjá sig í Mercedes Benz 230G en einnig ML430, en báðir eru jeppar.
Vera má að Maybach hafi losað páfa undan þeim vandræðum að finna næsta bíl sinn því nýjasti þjóðhöfðingjabíll Maybach, sem fengið hefur heitið Landaulet, var frumsýndur fyrir skemmstu.
Mercedes Benz hyggst setja bílinn í framleiðslu en bíllinn er í stíl við eldri bíla Benz af svipuðum meiði; afskaplega stór, vel útbúinn og geipilega dýr. Spurningin er bara hvort einhverjir fleiri en páfinn og þjóðhöfðingjar í heitum löndum hafi efni og ástæðu til að kaupa bílinn.