Skólahreysti á Skjá einum er ótrúlegasti þáttur sem framleiddur hefur verið fyrir íslenskt sjónvarp. Ég sé fyrir mér hugmyndasmið þáttanna ganga á fund stjórnenda sjónvarpsstöðvarinnar með glansandi leðurskjalatösku og bros sem bræðir hjörtu. Á fundinum opnar hann skjalatöskuna með nokkrum hröðum og öruggum hreyfingum. Hann tekur upp blað sem hann leggur á borðið.
Stjórnendur Skjás eins taka upp blaðið og líta forviða hver á annan. Þeir hugsa með sér að honum geti ekki verið alvara, en finnst hugmyndin spennandi og ögrandi í senn. Loks rýfur annar þögnina, ræskir sig og segir með titrandi röddu: „Þú vilt framleiða þátt um... barnaþrælkun?“
Ég sé ekki fyrir mér hvað gerist næst. Með klókindum hefur Skjá einum tekist að framleiða sjónvarpsþátt úr hugmyndinni og börnin hafa gaman af því að púla. Fræg poppstjarna er ráðin til að hressa upp á þáttinn og í staðinn fyrir að taka aðstæður í þriðja heiminum til fyrirmyndar er öskrandi börnum hópað á áhorfendapalla íþróttasalar og litla afreksfólkið púlar sig í gegnum nokkrar þrautir sem eru á mörkum hins ómannúðlega.
Til baka
Leita í greinasafni
Prenta grein
