FULLTRÚAR Akraneskaupstaðar, þeir Gísli S. Einarsson, bæjarstjóri og Jón Pálmi Pálsson bæjarritari, hafa síðustu daga átt tvo fundi með forráðamönnum Strætó bs um áframhald samnings um akstur á milli Akraness og Reykjavíkur en gagnkvæmur vilji er til endurnýjunar samningsins, segir á heimasíðu Akraness. Jafnframt hafa farið fram viðræður við fulltrúa Teits Jónassonar sem sér um aksturinn á leið 27, hvað varðar ástand vagna og gæði þjónustunnar.
Strætó bs fyrirhugar á vormánuðum að bjóða út akstur ýmissa leiða í leiðarkerfi Strætó bs, þ. á m. leið 27 til Akraness. Gert er ráð fyrir að samningar liggi fyrir um akstursleiðir á sumarmánuðum og að kröfur um m.a. nýja vagna og fyrirkomulag þjónustu verktaka verði uppfylltar eigi síðar en í byrjun sumars árið 2009.